کوردپرێس:
پەیمانگای ئەمریکیی ئەمریکەن ئەنتەرپرایز لە وتارێکدا نووسیویەتی سیاسەتەکانی تورکیا بە سەرۆکایەتیی ئەردۆغان لە هەندێک مەسەلەی وەک داعش و ئازادیی دەربڕین و مامەڵەکردن لەگەڵ کورد سیاسەتی ناڕەوا و قبووڵنەکراوە.
پەیمانگای ئەمریکەن ئەنتەرپرایز دەشنووسێت ئەو تورکیایە ئەردۆغان سەرۆکایەتیی دەکات مامەڵەی دوژمنکارانە لەگەڵ کورد و بەتایبەتی لەگەڵ کوردەکانی سووریا دەکات و ئەنقەرە هەوڵ دەدات پاکتاوی ڕەگەزی دژی کوردەکانی باکووری سووریا ئەنجام بدات.
پەیمانگاکە لە درێژەی بابەتەکەی خۆیدا جەختیشی کردۆتەوە تورکیا بەردەوامە لە دوژمنایەتی کردنی کوردەکان و لەم دوایییەشدا دەستی کردۆتەوە بە تۆپباران کردنی گوندە کوردنشینەکانی عێراق.
ئەمریکەن ئەنتەرپرایز ئەوەشی زیاد کردووە کە ئەمریکا بە پشتگیری کردن لە کوردەکانی سووریا ئاسایشی نیشتمانیی تورکیای ئیهمال کردووە بەڵام تورکیا خۆی لەم بارەیەوە خەتابارە چوونکە سیاسەتی دووفاقیی گرتۆتە بەر و ئەمریکا ناچار بوو بۆ ڕووبەڕووبوونەوەی داعش پشتگیریی هێزە کوردییەکانی سووریا بکات.
ئەو پەیمانگایە ئەوەشی ڕوون کردۆتەوە کە تورکیا لە سەردەم سەرۆکایەتیی ئەردۆغاندا لە هەموو کاتێک زیاتر لە ئەمریکا دوور کەوتۆتەوە.
وتارەکەی ئەمریکەن ئەنتەرپرایز دەشنووسێت کە حکوومەتی تورکیا بەرەو تۆتالیتاریی زیاتر دەکشێت و ئاسۆیێک بۆ پێشکەوتنی دیموکراسیەت لە تورکیا لە سەردەمی سەرۆکایەتیی ئەردۆغاندا بەدی ناکرێت.
Your Comment