بەپێی هەواڵی کوردپرێس، لە درێژەی کۆبوونەوەکانیان لە بەغدا، شاندی حکوومەتی هەرێمی کوردستان بە سەرۆکایەتیی قوباد تاڵەبانی، جێگری سەرۆک وەزیران لەگەڵ شاندێکی دەستەی سیاسی رەوتی سەدر بە سەرۆکایەتیی نەسار روبەیعی کۆ بوونەوە و هەردوولا جەختیان لەسه‌ر بەردەوامی پەیوەندییەکان کردەوە، لەپێناو گەیشتن بە رێکەوتنی هاوبەشی نێوان هەولێر و بەغدا.
لەو دیدارەدا دەستەی سیاسی رەوتی سەدر پشتگیری خۆیان بۆ چارەسەرکردنی کێشە هەڵپەسێردراوەکانی نێوان هەولێر و بەغدا دەربڕی و رایانگەیاند: "رازی نابن مافی هاووڵاتیانی هەرێمی کوردستان زەوت بکرێت".
لە کۆبوونەوەکەدا قوباد تاڵەبانی ستایشی هەڵوێستی رەوتی سەدری کرد و جەختی لە پێویستی هەماهەنگی لە نێوان هەموو لایەنە عێراقییەکان کردەوە، بۆ ئەوەی بە تێگەیشتنی زیاتر هەموو کێشەکان چارەسەر بکرێن، بە تایبەت لەم قۆناغەدا، کە عێراق لە بارودۆخێکی تایبەتدایە.
لە کۆبوونەوەکەدا هەردوولا له‌سه‌ر به‌رده‌وامیدان به په‌یوه‌ندییه‌کان و ئاڵۆوگۆڕکردنی زانیارییه‌کان رێکەوتن، ئه‌مه‌ش لەپێناو چارەسەرکردنی سەرجەم کێشە هەڵپەسێردراوەکانی نێوان هەرێم و ناوەند.
کۆدی هەواڵنێر: 60113
Your Comment