کوردپرێس:

فواد مەعسوم، سەرۆك كۆماری عێراق لە بەیاننامەیێكدا، ڕایگەیاندووە، لە كۆبوونەوەی ناڕەزایی هاووڵاتییانیان كە زۆربەیان بێكار و بێ دەرامەتن و داوای دۆزینەوەی دەرفەتی كار و دابینكردنی خزمەتگوزاری و چاككردنی باری ئابوری و گوزەرانیان دەكەن، داوا لە لایەنە ئەمنیەكان دەكەین، پارێزگاری لە خۆپیشاندانەكان بكەن تا گرژیی لێ نەكەوێتەوە، خۆپیشاندانەكان-یش بەلارێدا نەبرێن.

لە ڕاگەیەنراوەكەی سەرۆك كۆماری عێراقدا هاتووە، داوا لە حكوومەتی خۆجێیی لە پارێزگاكە و حكوومەتی فیدراڵی دەكەین، كاری جدی و بەپەلە بكەن بۆ بەدەنگەوە چونی داخوازیی رەوای خۆپیشاندەران و گرتنە بەری ھەنگاوی جدی و پراكتیكی بۆ چاككردنی خزمەتگوزارییەكان و چارەسەركردنی ئەو ئاستەنگانەی، كە هاووڵاتییانی لە ناوچە جیاجیاكانی پارێزگاكە بێزار و وەڕس كردوە.

فواد مەعسووم داوای لە هاونیشتمانییانی عێراقی کرد ھێمنی و پابەند بوون بە قانوون و دان بەخۆدا گرتن و زیان نەگەیاندن بە بیناو موڵك و ماڵی حكوومەت و ئۆفیسی كۆمپانیاكانی نەوت بخەنە سەرو ھەرشتێكی ترەوە.

چەند ڕۆژێکە خۆپیشاندان دژی کەمیی خزمەتگوزاری لە چەند شارێکی عێراق دەستی پێکردووە و شەوی ڕابردوو بە مەبەستی پاڵپشتیی شارەکانی باشووری عێراق خۆپیشاندان لە بەغدای پایتەختیش دەستی پێکرد.

هاوکات موقتەدا سەدر، سەرۆکی رەوتی سەدر پشتیوانیی خۆی بۆ خۆپیشاندەران دەربڕی و لە تۆڕی کۆمەڵایەتیی توویتەر نووسیویەتی: "رێگە نادەین هێرش بکرێتە سەر خۆپیشاندەرە ستەملێکراوەکان و ئومێدواریشین خۆپیشاندەران پارێزگاری لە موڵک و ماڵی گشتی بکەن کە موڵکی گەلە نەک گەندەڵکاران".