به‌پێی هه‌واڵی کوردپرێس، ئارێز عه‌بدوڵڵا په‌رله‌مانتاری خولی پێشووی فراكسیۆنی یه‌كێتی له ئه‌نجومه‌نی نوێنه‌ران له لێدوانێكدا به SNNی ڕاگه‌یاند: "بۆ هه‌نارده‌ی نه‌وتی که‌رکووک، هه‌ولێر دوو بژارده و مه‌رجی خستۆته به‌رده‌م به‌غدا سه‌باره‌ت به‌هه‌نارده و گواستنه‌وه‌ی نه‌وتی که‌رکووک له ڕێگه‌ی بۆریه‌كانی هه‌رێمه‌وه بۆ بازاڕه‌كانی جیهان."
ناوبراو سه‌باره‌ت به‌و دوو بژارده و مه‌رجه‌ش وتی: "یه‌که‌م مه‌رج ئه‌وه‌یه هه‌رێمی كوردستان داوای له عێراق كردوووه به مه‌رجی پێدانی كرێی گواستنه‌وه به بۆریه‌كه‌ی هه‌رێم، هه‌ولێر ڕازی ده‌بێت نه‌وتی که‌رکووک ڕه‌وانه‌ی ده‌ره‌وه‌ی وڵات بكرێت و مه‌رجی دووهه‌م ئه‌وه‌یه كه ده‌بێت سووته‌مه‌نی بدرێته هه‌رێمی كوردستان به‌ڵام تا ئێستا وه‌ڵامی پێشنیازه‌كانی حكوومه‌تی هه‌رێم نه‌دراوه‌ته‌وه."
فه‌رهاد حه‌مزه ئه‌ندازیار له كۆمپانیای نه‌وتی باكوور به SNNی وت: "ئێمه ته‌نها لایه‌نی جێبه‌جێكارین و ئه‌گه‌ر هه‌رێم و عێراق بگه‌نه ڕێكکه‌وتن یان هه‌ر هه‌نگاوێک بنێن ئێمه جێبه‌جێی ده‌كه‌ین و ورده‌كارییه‌كه‌ی بۆ ئێمه ئاشكرا ناكرێت."
ناوبراو ئه‌وه‌شی وتوووه: "هه‌ر ڕێکكه‌وتنێک له‌سه‌ر هه‌نارده‌ی نه‌وتی که‌رکووک بكرێت داواكه ئاراسته‌ی ئێمه ده‌كرێت و ئه‌وكات كاری له‌سه‌ر ده‌كرێت."
کۆدی هه‌واڵنێر: 60103
Your Comment