کوردپرێس:
ڕۆژی چوارشه‌ممه، 14ی نیسانی 2021 د. به‌رھه‌م ساڵح، سه‌رۆك كۆماری عێراق به‌بۆنه‌ی ساڵیادی كاره‌ساتی ئه‌نفال په‌یامێكی بڵاوكرده‌وه و رایگه‌یاند، كاره‌ساتی ئه‌نفال، یادی تاوانێكی دڕندانه‌ی له بیرنه‌كراوه دژ به خه‌ڵكی كوردستان، تاوانێك كه به ئامانجی كۆمه‌ڵكوژی میلله‌تێك ده‌ستی غه‌در و كوشتنی له ژن و منداڵ و پیر و جوانی كوردستان نه‌پاراست.
ده‌قی په‌یامه‌كه‌ی سه‌رۆك‌كۆماری عێراق:
یاده‌وه‌ری كاره‌ساتی ئه‌نفال، یادی تاوانێكی دڕندانه‌ی له بیرنه‌كراوه دژ به خه‌ڵكی كوردستان، تاوانێك كه به ئامانجی كۆمه‌ڵكوژی میلله‌تێك ده‌ستی غه‌در و كوشتنی له ژن و منداڵ و پیر و جوانی كوردستان نه‌پاراست.
له‌م یاده‌وه‌ریه تاڵه‌دا، گه‌ل پێویستی به‌یه‌ك ریزی و بونیاتنانه‌وه‌ی گیانی پێكه‌وه‌ھه‌ڵكردن و یه‌ك ئیراده‌یی و یه‌كخستنی ھه‌مو ھه‌وڵ و تواناكانه بۆ رێگه‌گرتن له دوباره‌بونه‌وه‌ی ئه‌و زوڵم و زۆرداری و كاره‌سات و مه‌رگه‌ساتانه‌ی له پڕۆسه‌ی به‌دناوی ئه‌نفالدا وه‌ك تراژیدیای سه‌ده به‌سه‌ر خه‌ڵكی ناوچه جیاوازه‌كانی كوردستان و ته‌واوی عێراقدا ھات.
كه‌سوكاری شه‌ھیدان و قوربانیانی ئه‌نفال، شایسته‌ی ئاوڕلێدانه‌وه و به‌ده‌نگه‌وه‌ھاتنی زیاترن، برینی ئه‌وان، برینی سه‌ر دڵی نیشتمانه، خواسته‌كانیان بۆ ژیانێكی شایسته و پێشكه‌شكردنی ماف و خزمه‌تگوزاری و گه‌ڕاندنه‌وه‌ی روفاتی ئازیزانیان، خواستی راست و ره‌وانن و پێویسته چیتر ئه‌و داواكاری و مافه ره‌وایانه، بۆ رۆژگار به‌جێنه‌ھێڵدرێن و زوبه‌زو ته‌كبیرێكی یاسایی و پێكه‌وه‌یی بۆ به پیره‌وه‌چون و به‌واقعكردنیان بكرێت.
به‌رھه‌م ساڵح
سه‌رۆك كۆماری عێراق
14/4/2021
Your Comment