به‌پێی هه‌واڵی کوردپرێس، ڕۆژی سێشه‌ممه 26ی حوزه‌یران مه‌سروور بارزانی ڕاوێژکاری ئه‌نجومه‌نی ئاسایشی هه‌رێمی کوردستان پێشوازیی له جه‌نه‌رال وۆلتر پایێت جێگری فه‌رمانده‌ی هێزی هاوپه‌یمانان له عێراق و سووریا و شاندی یاوه‌ری کرد.
له‌و دیداره‌دا دوا په‌ره‌سه‌نده‌کانی ناوچه‌که و پێشخستنی زیاتری میکانیزمی هه‌ماهه‌نگیی نێوان هێزه په‌یوه‌ندیداره‌کان و ڕووبه‌ڕووبوونه‌وه‌ی هه‌ڕه‌شه‌ی تیرۆریزم گفتوگۆیان له‌سه‌ر کرا.
مه‌سروور بارزانی وێڕای جه‌ختكردنه‌وه له بایه‌خ و گرینگیی ئاسایی کردنه‌وه‌ی دۆخی ناوچه کوردستانییه‌کانی ده‌ره‌وه‌ی ئیداره‌ی هه‌رێمی كوردستان و هاوکاریی زیاتری هێزی پێشمه‌رگه بۆ ڕێگری كردن له جموجۆڵ و ڕووبه‌ڕووبوونه‌وه‌ی هه‌ڕه‌شه‌كانی تیرۆریستان ئاماژه‌ی به‌وه دا پێویسته دۆسیه‌ی ئه‌منی ناوچه کوردستانییه‌کانی ده‌ره‌وه‌ی ئیداره‌ی هه‌رێم به هه‌ماهه‌نگیی گشت لایه‌نه پێوه‌ندیداره‌کان به‌ڕێوه بچێت.
له به‌رامبه‌ردا جێگری فه‌رمانده‌ی هێزی هاوپه‌یمانان هه‌ماهه‌نگیی نێوان هاوپه‌یمانان و پێشمه‌رگه‌ی له جه‌نگی دژ به تیرۆریستان به‌رز نرخاند و دووپاتی کرده‌وه که هێزی هاوپه‌یمانان له هاوکاری و مه‌شق و پاڵپشتیكردنی هێزی پێشمه‌رگه به‌رده‌وام ده‌بن.
سه‌رچاوه: ماڵپه‌ڕی فه‌رمیی پارتی دیموکراتی کوردستان
کۆدی هه‌واڵنێر: 60103
Your Comment