کوردپرێس:
زانا ڕۆستایی نوێنەری کوردی ئەنجومەنی نوێنەرانی عێراق لە پشکی کۆمەڵی ئیسلامی بڕیارەکەی دادگای فیدراڵی عێراق بە بڕیارێکی سەرکەوتووانە دەزانێت و دەڵێت بڕیارەکە تەنها یەک مادەی بە نادەستووری لە قەڵەم دا و بە زووترین کات دەست دەکرێتەوە بە ژماردنەوەی دەستیی دەنگەکان و دەبێت ئەندامانی کۆمسیۆنی پێشوو ڕووبەڕووی دادگا بکرێنەوە.
ناوبراو سەبارەت بە دەنگدانی تایبەت و دەنگی ئاوارەکانیش وتی دادگا بڕیاری خۆی داوە و ئەمێنێتەوە ئەوەی کە ئەگەر سکاڵا لە سەر بنکەیێکی تایبەت ببێت دەبێت بەڵگە پێشکەش بکرێت بۆ هەڵوەشاندنەوەی دەنگی ئەو بنکانە.
زانا ڕۆستایی زیادی کرد ئەگەر ساختەکاری لە ژماردنەوەی دەنگەکاندا نەکرێت ئەوا هاوکێشە گەورەکان ناگۆڕدرێت بەڵام ژمارەیێک کورسی بۆ لایەنە ناڕازییەکان دەگەڕێتەوە. پڕۆسەی ژماردنەوەی دەنگەکانیش بەپێی بەشداریی ژمارەی فەرمانبەران لە دە بۆ زیاتر لە بیست ڕۆژ دەخایەنێت.
ئەو ئەندام پەڕلەمانەی کۆمەڵی ئیسلامی سەبارەت بە مەترسیی ئاڵۆز بوونی دۆخی عێراق پاش گۆردرانی ئەنجامەکان بە کوردپرێسی وت چاوەڕوان ناکرێت دەنگی هاوکێشە گەورەکان بگۆڕدرێت بەڵکوو تەنها دەنگی هەندێک حیزب وەکوو یەکێتی دەگۆڕدرێت و یەکێتیش لە ئاستی عێراقدا ناتوانێت قەیران دروست بکات.
زانا ڕۆستایی ڕەخنەی لەوەش گرت کە ئەندام کۆمسیۆنەکان و تەنانەت ئەو دادوەرەش لە هەولێر چاودێریی پڕۆسەی ژماردنەوەی دەنگەکان دەکەن سەر بە پارتی دیموکراتی کوردستانن و مەترسیی ئەوەش هەیە کە بە قازانجی حیزبەکەی خۆیان پەردەپۆشی ساختەکارییەکان بکەن
شیاوی ئاماژەیە پێش دوو ڕۆژ دادگای فیدراڵی عێراق سەبارەت بە هەمواری یاسای هەڵبژاردنی پەڕلەمانی عێراق بڕیاری دا و بەو پێیەش هەڵوەشاندنەوەی دەنگی تایبەت پەسەند نەکرا بەڵام ژماردنەوەی دەستیی دەنگەکان بە پڕۆسەیێکی یاسایی و دەستووری زانرا و هەر بەو پێیەش ئەمڕۆ 23ی حوزەیران ژماردنەوەی دەستیی دەنگەکان بە فەرمی دەستی پێکرد.
Your Comment