کوردپرێس:
سه‌لاحه‌دین ده‌میرتاش، به‌ربژێری هه‌ده‌په بۆ هه‌ڵبژاردنه‌كانی سه‌رۆكایه‌تیی كۆماری توركیا له نوێترین په‌یامیدا له توویته‌ر رایگه‌یاند "ئه‌م په‌یامه‌م تایبه‌ته بۆ ئه‌و کەسانەی كه پێیانوایه به ده‌نگێك هیچ گۆڕانكاری نابێت و تاوه‌كو ئێستاش بڕیاریاننه‌داوه بچنه سەر سندووقی ده‌نگدان. به‌ڵێ، ده‌نگێك زۆره بۆ ئه‌وه‌ی گۆڕانكاری زۆر بكرێت".
ده‌میرتاش له توویته‌كه‌یدا ده‌ڵێت "ئه‌م وڵاته نیشتمانی هاوبه‌شی هه‌موومان و ماڵی هه‌موومان ده‌مێنێته‌وه. ئێستا كاتی دوودڵی و رارابوون نییه، كاتی هه‌ڵوێست و بڕیاردانه. پێویسته بچنه سه‌ر سندووقی ده‌نگدان و ده‌نگ بده‌ن. هه‌رگیز مه‌ڵێن به ده‌نگێك چی ده‌گۆڕێت؟ زۆر شت ده‌گۆڕێت".
کاندیدی هەدەپە بۆ سەرۆککۆماری تورکیا ده‌شڵێت "حكومه‌ت ته‌نیا به‌رپرسیاره له ئاسایشی ده‌نگده‌ران، به‌ڵام ئه‌ركی هاونیشتمانییانه ده‌نگه‌كانیان بپارێزن. چاودێر بن و نوێنه‌ری ده‌نگه‌كانتان بن و خاوه‌نداری داهاتوو و ئیراده‌تان بن".
سه‌لاحه‌دین دەمیرتاش 20 مانگە بە چەند تۆمەتێک زیندانی كراوە، بەو هۆیەوە لەڕێگەی ڤیدیۆ و توویتەرەوە بانگەشەی هەڵبژاردن دەکات.
Your Comment