به‌پێی هه‌واڵی کوردپرێس، ڕۆژی دوشه‌ممه 18ی حوزه‌یران‌ خالید شوانی ئه‌ندامی سه‌ركردایه‌تیی یه‌كێتی سه‌باره‌ت به‌ چوونی وه‌فدی یه‌كێتی و پارتی بۆ به‌غدا به ‌میدیای حزبه‌كه‌ی ڕاگه‌یاندوووه‌ كه‌ ئه‌وان به‌ باشی ده‌زانن هه‌موو هێزه‌ كوردستانییه‌كان به‌ وه‌فدێک و به‌رنامه‌یێكی هاوبه‌ش به‌شداری له‌ كۆبوونه‌وه‌ له‌گه‌ڵ لایه‌نه‌ عێراقییه‌كان بكه‌ن.

خالید شوانی ئاماژه‌ی به‌وه‌ش داوه‌ "تا ئێستا هیچ بانگهێشتی ڕه‌سمی بۆ ده‌ست پێكردنی گفتوگۆكان له‌باره‌ی پێكهێنانی حكوومه‌تی نوێی عێراق ئاڕاسته‌ی یه‌كێتی نه‌كراوه‌ بۆیه‌ هه‌ركات بانگهێشتمان پێگه‌یشت پێشوازی لێده‌كه‌ین."

ئه‌و ئه‌ندامه‌ی سه‌رکردایه‌تیی یه‌کێتی جه‌ختیشی كردۆته‌وه‌ كه‌ حزبه‌كه‌ی پێشوازی له‌ هه‌ر هه‌نگاوێک ده‌كات كه‌ به‌ ئاڕاسته‌ی په‌له‌كردن بێت بۆ پێكهێنانی حكوومه‌تی نوێی عێراق و "ده‌ربازبوون له‌ قه‌یرانی سیاسی و چاره‌سه‌ر كردنی كێشه‌كان."

سه‌رچاوه‌: شارپرێس

کۆدی هه‌واڵنێر: 60103