بەپێی هەواڵی کوردپرێس سەرۆککۆماری سووریا گفتوگۆیێکی لەگەڵ ڕۆژنامەی "میل ئۆن ساندەی" کردووە و لە دیمانەکەیدا وتوویەتی ڕاوێژکارە ئێرانییەکان لە سەر بانگهێشتی دیمەشق هاتوونەتە سووریا بەڵام بوونی سەربازیی ئەمریکی و بەریتانییەکان نموونەی ئاشکرای سنووربەزاندن و دەستدرێژی کردنە بۆ سەر سەروەریی سووریا.

بەشار ئەسەد سەبارەت بە ڕێکخراوی "کڵاو سپییەکان" وتی ئەو ڕێکخراوەیە باڵێکی گرووپی نوسرەیە کە سەر بە قاعیدەن و دیمەشق بە دەساوی دەستی بەریتانیای دەزانێت کە وەکوو کارتی گوشار لە مامەڵە نێودەوڵەتییەکانیدا بەکاری دەهێنێت.

بەشار ئەسەد ڕەخنەی توندی لە ئەمریکا گرت و وتی هاوپەیمانیی دژەداعش بە سەرکردایەتیی ئەمریکا پشتگیریی داعشیان کردووە.

ناوبراو گوتیشی دەوڵەتی دیمەشق پشتئەستوورە بە پشتیوانیی گەلی سووریا و تەنها پشتگیریی ڕووس و ئێرانییەکان هۆکار نەبووە لە دەسەڵاتی دەوڵەتی دیمەشق بەڵکوو ئەوان زیاتر پشتئەستوورن بە پشتیوانیی گەلی سووریا.

بەشار ئەسەد سەبارەت بە ئەو هەواڵانەی لە سەر هێرشی کیمیایی بڵاو بووبوویەوە ڕایگەیاند بەریتانیا و فەڕەنسا و ئەمریکا درۆیان لەگەڵ هەموو جیهان کرد و ئەو هێرشە ئیدعایی و ساختەییەیان سازاند.

سەبارەت بە پێوەندی گرتنی چەند دەزگای هەواڵگری و ئیستیخباراتیی ئەورووپیش ئەسەد ئاشکرای کرد کە چەند دەزگایێکی هەواڵگری پێوەندییان بە دیمەشقەوە کردووە و داوای هەواڵ و زانیارییان کردووە بەڵام حکوومەتی سووریا وتوویەتی تا ئەو کاتەی هەڵوێستی وڵاتانی ئەورووپی بەرانبەر بە دەوڵەتی دیمەشق نەگۆڕدرێت ئامادە نین هاوکاریی ئەو دەزگا ئیستیخباراتییانە بکەن.

سەرۆکی سووریا دەنگۆی دەستبەسەرکران تیرۆریستی هاووڵاتیی بەریتانیشی ڕەت کردەوە و ڕایگەیاند کە لەو بڕوایەدا نییە هاووڵاتیی بەریتانی بە زیندووی لە سووریا مابێت چوونکە ئەوان هەر لە بنەماوە بۆ ئەوە دێنە ڕیزی تیرۆریستەکان کە بکوژرێن و بەخەیاڵی خۆیان بڕۆن بۆ بەهەشت.

ڕۆژنامەڤانی ڕۆژنامەی "میل ئۆند ساندەی" ئەم پرسیارەشی لە بەشار ئەسەد کرد: بۆچی ڕووسیا ژێربەژێر لە سەر هێرشەکانی ئیسراییل بۆ سەر وڵاتی سووریا لەگەڵ دوژمنانی ئێوە ڕێککەوتنی هەیە؟

ئەسەد لە وەڵامدا ڕەتی کردەوە ڕووسیا چ لە باری سەربازییەوە چ لە باری سیاسییەوە دژ بە سووریا ڕێککەوتنی ژێربەژێری لەگەڵ هیچ لایەن یان وڵاتێک بووبێت و ئەو بابەتەی دژ بە یەک زانی و دەنگۆی ڕێککەوتنیشی بە درۆ و ساختەکاری وەسف کرد.

سەرۆکی سووریا پرسێکی هەرە گرینگی دیکەشی باس کرد کە ئەوەش بریتی بو لە مانەوە یان کشانەوەی هێزی ئەمریکی لە سووریا. هەر لەو بارەیەشەوە ئەسەد دیسانەوە تۆمەتی پشتگیری کردنی ئەمریکا لە تیرۆریستانی خستەوە ڕوو و ڕایگەیاند ئەرکی سەر شانی دەوڵەتی سووریایە شەڕی دژ بە تیرۆر بکات و بەڵێنی ئەوەشی دا کە بست بە بستی خاکی سووریا ئازاد دەکەن و ئەوەش بڕیارێکی سیاسی نییە بەڵکوو ئەرکی نیشتمانیی دەوڵەتی سووریایە.