بەپێی هەواڵی کوردپرێس، مه‌سروور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازی كرد له جه‌نه‌ڕاڵ برادلی بێكه‌ر به‌رپرسی نووسینگه‌ی هاوكاریی ئاسایش له باڵیۆزخانه‌ی ئه‌مریكا له عێراق.
له‌م دیداره‌دا به‌رنامه‌ی درێژخایه‌نی مه‌شق و راهێنان و دابین كردنی پێداویستی سه‌ربازی بۆ هێزه‌كانی پێشمه‌رگه تاووتوێ كرا و ئه‌نجامه‌كانی هه‌ڵبژاردنی 12ی ئایاری رابردووی عێراق خرایه به‌ر باس و بارزانی وتی: هه‌رێمی كوردستان لاری نییه له ژماردن و جیاكردنه‌وه‌ی ده‌نگه‌كان به‌ده‌ست.
هەروەها مه‌سروور بارزانی ئاماژه‌ی به گرینگی پێكهێنانی هاوپه‌یمانی كوردستانی له نێوان سه‌رجه‌م لایه‌نه‌كانی كوردستان دا و رایگه‌یاند: به پێكهێنانی فراكسیۆنی هاوپه‌یمانی كوردستان باشتر ده‌توانرێت به‌رگری له مافه‌كانی خه‌ڵک و هه‌رێمی كوردستان بكرێت.
له ته‌وه‌رێكی دیكه‌دا گفتوگۆ له‌باره‌ی به‌رنامه‌ی چاكسازی و رێكخستنه‌وه‌ی وه‌زاره‌تی كاروباری پێشمه‌رگه كرا و له‌لای خۆیه‌وه جه‌نه‌ڕاڵ بێكه‌ر رایگه‌یاند: نووسینگه‌ی هاوكاری ئاسایش له چوارچێوه‌ی ستراتیژی ئاسایشی هه‌رێمیی و سه‌رپه‌رشتی كردنی به‌رنامه‌كانیدا له پشتیوانی كردنی و ره‌چاو كردنی هاوكارییه‌كان بۆ هێزه‌كانی پێشمه‌رگه به‌رده‌وام ده‌بێت.
سەرچاوە: کوردستان 24
کۆدی هەواڵنێر: 60113
Your Comment