كاوه محه‌مه‌د ئه‌ندامی فراكسیۆنی گۆڕان له په‌رله‌مانی عێراق به شــارپــرێــس-ی ڕاگه‌یاند: له پاش بڕیاره‌كانی ئه‌مڕۆی په‌رله‌مانی عێراق و له ناویشیاندا هه‌ژماركردنه‌وه‌ی سه‌رجه‌م ده‌نگه‌كان به‌ده‌ست، هه‌ر له‌مڕۆوه ده‌بێت ئه‌و بڕیاره بكه‌وێته بواری جێبه‌جێ كردنه‌وه، ده‌نگه‌كان له سه‌رتاسه‌ری عێراق به‌ده‌ست هه‌ژمار بكرێنه‌وه.
به‌وته‌ی كاوه محه‌مه‌د "پڕۆسه‌ی هه‌ژماركردنه‌وه‌ی ده‌نگه‌كان له لایه‌ن 9 دادوه‌ره‌وه سه‌رپه‌رشتی ده‌كرێت، چوونكه كاره‌كانی كۆمیسیۆنی هه‌ڵبژاردنه‌كان سڕ كرا و ئه‌وان ناتوانن سه‌رپه‌رشتی هه‌ژماركردنه‌وه‌كه بكه‌ن".
ئه‌ندامه‌كه‌ی فراكسیۆنی گۆڕان له په‌رله‌مانی عێراق باسی له ورده‌كاری هه‌ژماركردنه‌وه‌ی ده‌نگه‌كان كرد و ڕای‌گه‌یاند: "بۆ هه‌ژماركردنه‌وه‌كه پشت به باركۆد و وێنه‌ی په‌نجه‌مۆری ده‌نگده‌ران ده‌به‌سترێت".
كاوه محه‌مه‌د به پێویستی زانی چاودێرییێكی وردی سندۆقه‌كان و كۆی به‌ڵگه‌نامه‌كانی دیكه‌ی په‌یوه‌ست به‌دواین هه‌ڵبژاردنی په‌رله‌مانی عێراق بكرێت، بۆ ئه‌وه‌ی پڕۆسه‌ی هه‌ژماركردنه‌وه‌كه دوور له گۆڕانكاری به‌ڕێوه بچێت.
سه‌رچاوه: شارپرێس
کۆدی هه‌واڵنێر: 60104
Your Comment