به‌پێی هه‌واڵی کوردپرێس، لە راگەیەنراوێکدا ھەڵگورد حیكمەت، بەڕێوه‌بەری راگەیاندن و هۆشیاری لە وەزارەتی پێشمەرگە رای‌گەیاند: ماوەی چەند رۆژێکە بە شێوەیێکی بەرچاو دەنگۆی ئاڵوگۆڕ لە وەزارەتی پێشمەرگە بوووە بە باسی فەیسبووک و ماڵپەڕەکان کە لەوانەیە ئەمە پەیوەندی بەوەوە هەبێت کە ساڵانێکی زۆرە لە وەزارەتی پێشمەرگە ئاڵوگۆڕ لە نێوان پۆستەکاندا نەکراوە.
ڕاشی‌گەیاند: هەندێک لە بەرپرسانی وەزارەتی پێشمەرگە و خودی خۆم بەتایبەت ئاڵوگۆر لە وەزارەتەکە بە شتێکی ئاسایی دەبینین و ئەنجام نەدانیشی بەکارێکی نایاسایی دەزانین و دوای نزیکەی نۆ ساڵ و بە تایبەت دوای چوار ساڵ لە شەڕ ناکرێت بەخۆداچوونەوە نەکرێت.
جەختیشی کردەوە: پێویستە ئاڵوگۆڕەکان لە وەزارەتی پێشمەرگە وەک هەر سوپایێکی تر بە ئاسایی وەربگرین و لە کات و ساتی خۆیدا ئەنجام بدرێت و پێویستە ئەم پرسە پاکێجێکی فەرمانگەی چاکسازی بێت بۆ ئایندەی وەزارەتەکە.
بەڕێوه‌بەری راگەیاندن و هۆشیاری لە وەزارەتی پێشمەرگە ئاشکرای کرد: هەموو ئەوانەی ئاڵوگۆڕ دەیانگرێتەوە جگە لە جێبەجێ کردنی یاسا و ئسوڵێکی سەربازی هیچی دیکە نییە، ئەوانەی کە شوێنی ئەو کەسانە دەگرنەوە کە شوێنەکانیان بەجێدەهێڵن هیچییان زیاتر نییە لەوان، بەڵکوو دوای تەواوکردنی ماوەی خزمەتیان ڕۆژێک دێت ئەوانیش ئەو پۆستە جێبهێڵن.
سه‌رچاوه: کوردستان TV
کۆدی هه‌واڵنێر: 60104
Your Comment