به‌پێی هه‌واڵی کوردپرێس، ڕۆژی‌ 29ی 5ی 2018 لیستێكی كۆمیسیۆنی باڵای سه‌ربه‌خۆی هه‌ڵبژاردنه‌كانی عێراق بڵاو كرایه‌وه‌ كه‌ ئاڕاسته‌ی لیژنه‌ی باڵای حكوومه‌تی عێراق كردوووه ‌و تێیدا ئه‌نجامی ده‌نگدان له‌ زیاتر له‌ هه‌زار وێستگه‌ی ده‌نگدانی هه‌ڵبژاردنه‌ په‌رله‌مانییه‌كه‌ی 12ی ئایار له‌ 10 پارێزگای عێراق و بنكه‌كانی ده‌ره‌وه‌ی وڵات هه‌ڵوه‌شێندراونه‌ته‌وه‌.

ڕزگار حاجی حه‌مه‌ جێگری سه‌رۆكی كۆمیسیۆنی باڵای سه‌ربه‌خۆی هه‌ڵبژاردنه‌كانی عێراق به‌ SNNی ڕاگه‌یاند: ئه‌و لیسته‌ی ئه‌مڕۆ بڵاو كراوه‌ته‌وه‌ هیچ كاریگه‌رییێكی له‌سه‌ر ئه‌نجامی هه‌ڵبژاردنه‌كه‌ نابێت چوونكه‌ ئه‌و وێستگانه‌ پێش ڕاگه‌یاندنی ئه‌نجامی به‌راییی هه‌ڵبژاردنی 12ی ئایار له‌لایه‌ن كۆمیسیۆن خۆیه‌وه‌ پوچه‌ڵ كراونه‌ته‌وه‌.

ناوبراو وتیشی: "ئه‌نجامه‌كانی كۆمیسیۆن دوای هه‌ڵوه‌شانه‌وه‌ی ئه‌و وێستگانه‌ بوووه‌ به‌ڵام هه‌ندێک سكاڵا و تانه‌ی دیكه‌ هه‌یه‌ كه‌ له‌لایه‌ن هه‌ندێک قه‌واره‌وه‌ پێشكه‌ش كراون و تا ئێستا یه‌كلایی نه‌كراونه‌ته‌وه."

کۆدی هه‌واڵنێر: 60103