بەپێی هەواڵی کوردپرێس به‌شێك له‌هاووڵاتییان كارتی‌ ده‌نگدانیان بۆ نه‌گه‌ڕاوه‌ته‌وه‌ ئه‌گه‌رچی‌ بایۆمه‌تریشییان ئه‌نجام داوه‌، ئه‌وان ترسیان هه‌یه‌ ڕێگه‌یان پێنه‌درێت ئه‌مڕۆ ده‌نگ بده‌ن و له‌بنكه‌كانی‌ ده‌نگدان كێشه‌یان بۆ دروست بێت.

له‌و باره‌یه‌وه‌ ڕزگار حاجی حه‌مه‌ جێگری‌ سه‌رۆكی‌ كۆمسیۆنی باڵای هه‌ڵبژاردنه‌كانی عیراق ڕایگه‌یاند، "هه‌ر هاووڵاتییێک له‌سیستمی‌ بایۆمه‌تری‌ به‌شداریی كردبێت و كارتی‌ ده‌نگدانی‌ بۆ نه‌گه‌ڕابێته‌وه‌، ئه‌وا ده‌توانێت به‌و پسووڵه‌ی‌ تۆماركردنه‌كه‌ی‌ پێیدراوه‌ ده‌نگبدات".

ناوبراو وتیشی‌:"به‌دڵنیاییه‌وه‌ هیچ هاووڵاتییێک ده‌نگی‌ نافه‌وتێت ئه‌گه‌ر ئه‌و پسووڵه‌ی‌ پێبێت و كارته‌كه‌شی‌ بۆ نه‌گه‌ڕابێته‌وه‌".

سه‌باره‌ت به‌ده‌نگدانی‌ تایبه‌ت بۆ هه‌ڵبژاردنی‌ ئه‌نجومه‌نی‌ نوێنه‌ران كه‌ به‌شێك له ‌هاووڵاتییان به‌هۆی‌ خاوی‌ له‌به‌ڕێوه‌چونی‌ سیستمی‌ ده‌نگدان و دروستبوونی‌ كێشه‌ی‌ ته‌كنیكی‌ له‌ئامێره‌كان له‌ده‌نگدان بێبه‌ش كران وتی‌:"ئه‌وانه‌ی‌ له‌هێزه‌ ئه‌منییه‌كان نه‌یانتوانیوه‌ ده‌نگ بده‌ن، بۆیان نییه‌ ئه‌مڕۆ له‌ده‌نگدانی‌ گشتی‌ به‌شداری بكه‌ن، چوونكه‌ واده‌ و كاتی‌ خۆیان كۆتایی هاتووه‌".