به‌پێی هه‌واڵی کوردپرێس، حەمە هاشم هونەرمەند بە تۆڕی میدیایی رووداوی راگەیاند: "ئەم پێشانگایە بە سپۆنسەری گرووپی ھونەری و کولتووری بووژان ئەنجام دراوە و 30 تابلۆی قەبارە ھاوشێوەی 70 بە 33 سانتیمەتر نمایش کراون و سەرجەم کارەکانیش لەسەر شێوازی ئەبستراکتی دەربڕینخوازی ئەنجام داوە".

بەگوتەی حەمە هاشم، ئەم پێشانگایە بە ھاوکاری (سەنتەری لالش) لە ھۆڵی (لالش زێنتروم) نمایش کراوە، لە رۆژی 18-4-2018 کراوەتەوە و چەند رۆژێک بەردەوام دەبێت.

کارەکانی (حەمە ھاشم) دەربڕی کێشە قووڵەکانی مرۆڤە، بەتایبەت کەسێتی تاکی کورد کە بەھۆی شەڕ و ئاشووبی زۆرەوە دووچاری شپرزەیی دەروونی و لە دەست دانی ھیوایەکانێتی بۆ ژیان.

ھەروەھا ئاڵۆزبوونی بیر و بۆچوونەکانی لە سەر مرۆڤ بوونی خۆی، ئەمەش ئاکامی ھەست کردنێکی پەنھان بە تەنھایی و بێکەسی، بە تایبەت لە پرسە گرنگەکانی وەک ھێرش و تۆقاندن و ڕفاندنی کوردانی ئێزدی و لە دەستدانی سنوور و ڕاوەدونان و نەھامەتییە یەک لەدوایی یەکەکانی ئەم مرۆڤە، کە بەدرێژایی مێژوو لەسەر جەستەی ھەڵکۆڵراوە.

ھونەرمەند ھەوڵی داوە لە رێگای فیگەرە تەنھاکانییەوە ئەوەمان بۆ دووبارە پێشان بداتەوە و پەیامێکیش بدات بە دونیا، جگە لەمەش لە تابلۆکانیدا خواستی نمایشی جوانبەخشی و ئیستاتیکی فەرامۆش نەکردوووە.

کۆدی هه‌واڵنێر: 60104