کوردپرێس:

عەلی ماهیر باشاریر نوێنەری شاری مێرسین لە پەرلەمانی تورکیا لە پشکی جەهەپە ئاماژە بەو تێچووانە دەکات کە سەرفی لیژنەی پاراستن و تیمی پاسەوانی ئەردۆغان دەکرێت و لەو بارەیەوە دەڵێت: هەر یەک جار کە سەرۆککۆماری تورکیا لە کۆشکی سەرۆکایەتیی کۆمارەوە بۆ پەرلەمان دەبرێت 5 ملوێن لیر سەرف دەکرێت.

تیمی پاسەوانیی ئەردۆغان لە ماوەی 7 مانگی یەکەمی ئەمساڵدا زیاتر لە 161 ملوێن لیریان سەرفی پاراستنی ئەردۆغان کردووە. پەرلەمانیش و کۆشکی کۆمارییش هەردووکیان بە شێوەیێکی چڕ و توند پارێزگارییان لێدەکرێت بەڵام بەوەشەوە هەموو جارێک دەرکەوتنێکی ئەردۆغان لە کۆشکەوە تا پەرلەمان 5 ملوێنی بۆ سەرف دەکرێت و کۆی ئەم تێچووەش بە سەر هاووڵاتییاندا دەشکێتەوە.

بەگوێرەی نووسراوی ئاژانسی Mezopotamya، ئەو پەرلەمانتارەی جەهەپە لە لێدوانەکەیدا ئاماژەی بەوەش کردووە کە ئەردۆغان لە کۆشکێکدا دەژی هەزار و 100 ژووری تێدایە. لە مارماریس کۆشکی تایبەتی دروست کردووە. لە ئەخلاتیش سەرای تایبەتی هەیە. ئێستاش سەرقاڵە بە بیناکردنی کۆشکێک لە قێبریس. تۆ سەرۆککۆماری ئەم وڵاتەی یان خود تەلارسازیت؟ ئەوەی نەهامەتی بوو بە سەر ئەم وڵاتەتان هێنا. بە پارەی کێ لە قێبریس کۆشک بینا دەکەیت؟ قەرزی سۆمالی بە پارەی کێ خەرج کرا؟