کوردپرێس، به‌گوێره‌ی ئه‌و زانیارییانه‌ی ده‌ست كوردستان 24 كه‌وتوووه، بڕیاره ئه‌مڕۆ شاندێكی حكوومه‌تی عێراق، سه‌ردانی هه‌رێمی كوردستان بكه‌ن به مه‌به‌ستی دوا رێكارەكان بۆ گه‌یشتن به رێككه‌وتن له‌گه‌ڵ هه‌رێمی كوردستان و چاره‌سه‌ركردنی كێشه‌كان.
سه‌ردان كردنی ئه‌م شانده‌ی به‌غدا له كاتێكدایه كه چه‌ند رۆژێک له‌مه‌وپێش حه‌یده‌ر عه‌بادی، سه‌رۆک وه‌زیرانی عێراق رای‌گه‌یاند كه پێش جه‌ژنی نه‌ورۆز مووچه‌ی فه‌رمانبه‌رانی هه‌ر دوو وه‌زاره‌تی په‌روه‌رده و ته‌ندروستی هه‌رێمی كوردستان ڕه‌وانه ده‌كات و هاوكات فڕۆكه‌خانه‌كانی هه‌رێمی كوردستانیش ده‌كاته‌وه.
ئەمە لە كاتێكدایە جگە لە لیژنەكانی وردبینی لە لیستی مووچەی فەرمانبەران، پێشتر چەند شاندێكی دیكەی حكوومەتی عێراق بۆ گفتوگۆ كردن لە بارەی كێشەكانی نێوان ھەولێر و بەغدا سەردانی ھەرێمی كوردستانیان كردوووە.
لە سەرەتای ساڵی 2014 حكوومەتی عێراق بودجەی ھەرێمی كوردستانی بڕی، دوای چەند مانگێک چەكدارانی داعش ھێرشەكانیان بۆ سەر ھەرێمی كوردستان و عێراق دەست‌پێكرد، ئەمەش لە بواری ئابووری سیاسی دۆخی ناوچەكەی ئاڵۆزتر كرد، سەرەڕای نەبوونی بڕی پارەی پێویست بۆ مووچەی فەرمانبەران، بەھۆی شەڕی داعش، حكوومەتی ھەرێمی كوردستان خەرجییێكی زیاتری كەوتەسەر. دوای دانووستان و چەندین كۆبوونەوە بەغدا ئامادەنەبوو كە بودجە و مووچەی فەرمانبەرانی ھەرێمی كوردستان بنێرێت.
دوای سێ ساڵ ڕیفراندۆمی خەڵكی كوردستان بۆ سەربەخۆیی لە 25/9/2017 بەڕێوەچوو، ھاووڵاتییانی كوردستان بە ڕێژەی زیاتر لە 92% دەنگیان بۆ سەربەخۆیی و جیابوونەوە لە عێراق دا، پاشان بەغدا ئابڵۆقەی ئاسمانی و زەمینی خستە سەر ھەرێمی كوردستان و بڕیاری داخستنی فڕۆكەخانە و دەروازە سنوورییەكانی باشووری كوردستانیدا.
کۆدی هه‌واڵنێر: 60104
Your Comment