به‌پێی هه‌واڵی کوردپرێس، شۆڕش حه‌سه‌ن به‌ڕێوه‌به‌ری گشتیی په‌یوه‌ندییه‌كان و ڕاگه‌یاندن له كۆمسیۆنی باڵای سه‌ربه‌خۆی هه‌ڵبژاردن و ڕاپرسی له هه‌رێم به SNNی ڕاگه‌یاند: له‌به‌ر ئه‌وه‌ی پاک كردنه‌وه‌ی تۆماری ده‌نگده‌ران له ناوی دووباره و مردوووان پڕۆسه‌یێكی زۆر زه‌حمه‌ت بوو، له ئێستادا سه‌رقاڵی دروست كردنی تۆمارێكی نوێین بۆ پڕۆسه‌ی هه‌ڵبژاردنه‌كان به جۆرێک جیاواز بێت له تۆماره‌كانی‌تر و تایبه‌تیش بێت به هه‌رێمی كوردستان.
ناوبراو وتیشی: "دوایین نوێ‌كردنه‌وه (ئه‌بده‌یت)ی فۆرمی به‌شه خۆراكی مانگانه‌ی هاووڵاتییان ده‌كرێته بنه‌ما بۆ ئه‌و تۆماره نوێیه، له ئێستاشدا چه‌ند قۆناغێكمان بڕیوه، له‌گه‌ڵ لایه‌نی په‌یوه‌ندیداریش گفتوگۆمان كردوووه، ئاواره و كه‌سانی بیانی لێ ده‌رهێندراوه و به شێوه‌یێكی فه‌رمی مامه‌ڵه‌كانیان په‌سه‌ند كراوه كه دانیشتووی هه‌رێمی كوردستانن و ناوی مردوو و ناوی دووباره‌شی تێدا نییه".
شۆڕش حه‌سه‌ن جه‌ختیشی كرده‌وه ئه‌گه‌ر به‌رده‌وام بوونایه له‌سه‌ر پاک كردنه‌وه‌ی تۆماره‌كه‌ی پێشوو كارێكی زه‌حمه‌ت ده‌بوو هه‌رچه‌ند لیستی ناوه‌كانیشیان بۆ ڕه‌وانه كرابوو به‌ڵام به‌راورد كردنیان پرۆسه‌یێكی قورس بوو و ئاشكراشی كرد: داتای پێویستمان له لایه‌نه په‌یوه‌ندییداره‌كانه‌وه پێ نه‌درا.
کۆدی هه‌واڵنێر: 60103
Your Comment