بەپێی هەواڵی کوردپرێس، پارتی یەکێتیی دیموکراتیکی سووریا لە ڕێگای بەیاننامەیێکەوە وێڕای سەرکۆنە کردنی دەستگیریی ساڵح موسلم هاوسەرۆکی پێشووی ئەو پارتە داوای لە کۆماری چێک کردووە هەرچی زووتر ئازادی بکات و داوای لێبووردنیش بکات بەهۆی ئەو کارە نایاسایی و نائەخلاقییە کە ئەنجامی داوە.

لە بەیاننامەکەدا ئاماژە بەوە کراوە ساڵح موسلم هاوسەرۆکی پێشووی پارتی یەکێتیی دیموکراتیکی سووریا و ئەندامی کۆمیتەی دیپلۆماسیی بزووتنەوەی کۆمەڵگای دیموکراتیکی کوردەکانی سووریا لەسەر داوای وڵاتی تورکیا دەستگیر کراوە و باس لەوەش کراوە: جەنابی موسلم لە خەباتی دژ بە داعش لە سووریادا ڕۆڵێکی دیپلۆماتیکی هەرە گرینگی بووە و لە کۆمەڵگای نێونەتەوەییشدا وەکوو کەسێک دەوری دەبینی کە ڕووداوە تیرۆریستییەکانی دەگەیاندە گوێی هەموو جیهان. لە سەردەمی سەرۆکایەتیشی لە یەکێتیی دیموکراتیکی سووریا هەوڵی زۆری داوە بۆ چارەسەر کردنی قەیرانی سووریا و وەکوو هاووڵاتیێکی سووریا دەنگی ڕاستەقینەی ئەم وڵاتەی گەیاندۆتە هەموو جیهان. موسلم بە ئێستاشیەوە خەریکی بزاڤێکی گرینگی دژە تیرۆر لە سووریا و ڕۆژهەڵاتی ناڤێنە.

سەرچاوە: هاوار نیووز

کۆدی هەواڵنێر: ٦٠١٠٥