به‌پێی هه‌واڵی کوردپرێس، هه‌واڵده‌ریی سی ئێن ئێن باس له‌وه ده‌کات له چه‌ند ڕۆژی ڕابردوودا هێزه‌کانی سه‌ر به تورکیا له ده‌وروبه‌ری شاری مه‌نبه‌ج ته‌قه‌یان به‌ره‌و بنکه و باره‌گای هێزه ئه‌مریکییه‌کانی جێگیر له‌و شاره کردوووه و به‌پێی ڕاپۆرته‌که هێزه سه‌ربزێوه‌کانی سه‌ر به تورکیا سه‌عاتێک پێش ئه‌وه‌ی پۆڵ فانک فه‌رمانده‌ی باڵای ئه‌مریکییه‌کان بۆ هاوپه‌یمانیی دژه‌داعش سه‌نگه‌ره‌کانی هێزی ئه‌مریکا و کورده‌کان له مه‌نبه‌ج به سه‌ر بکاته‌وه ته‌قه‌یان به‌ره‌و بنکه و باره‌گاکانیان کردوووه.
فانک له‌مباره‌وه به سی ئێن ئێن ده‌ڵێت: ئه‌گه‌ر هه‌ڕه‌شه بکرێته سه‌ر هێزه‌کانی ئێمه ئه‌وا نیگه‌ران ده‌بین به‌ڵام ئه‌گه‌ر هێرشه‌کان به‌رده‌وام بن ئێمه‌ش به‌رگری له خۆمان ده‌که‌ین.
سه‌باره‌ت به به‌شداریی هێزی کورد- عه‌ره‌بی سووریای دیموکراتیکیش گوتی: ئه‌وانه‌ی له شه‌ڕی ڕه‌قه‌دا بۆ ڕزگار کردنی ئه‌و شاره له بنده‌ستی داعش هه‌وڵیان داوه و تێکۆشاون قاره‌مانن.
ژێنڕاڵ فانک جه‌ختیشی له‌سه‌ر گفتوگۆی نێوان ئه‌مریکا و تورکیا سه‌باره‌ت به ناوچه‌کانی ژێر کۆنتڕۆڵی کورد و هاوکاریی ئه‌مریکا له‌گه‌ڵ کورده‌کان کرده‌وه و سه‌باره‌ت به‌وه‌ی که ئایا واشنتۆن هه‌مبه‌ر داواکارییه‌که‌ی بۆ چۆڵ کردنی مه‌نبه‌ج وه‌ڵامی ئه‌رێنی ده‌بێت یان نا ده‌ری‌بڕی: من پێم وایه ده‌بێت ناوچه‌که له داعش پاک بکه‌ینه‌وه. ئه‌م هێزه‌ی ئه‌مریکاش له دزه‌ی داعش بۆ ناو تورکیا و ئه‌ورووپا ڕێگری ده‌کات.
کۆدی هه‌واڵنێر: 60103
Your Comment