بەپێی هەواڵی کوردپرێس، لە ڕۆژی ڕابردووەوە ئۆپەراسیۆنی ئاسمانی و زەوینیی ئەرتەشی تورکیا لە ژێر ناو لقی زەیتوون دژ بە عەفرین دەستی پێکردووە و بەگوێرەی ڕاپۆرتەکان هێزەکانی سوپای ئازادیش لەو ئۆپەراسیۆنەدا بەشدارن. دەوڵەتی تورکیا دەڵێت ئەو ئۆپەراسیۆنە بۆ لە ناوبردنی تێرۆریستەکان دەستی پێکردووە، تورکیا یەکینەکانی پاراستنی گەل وەکوو تیرۆریست ناو لێدەبات و دەڵێت YPG لە لقەکانی PKKیە.

بەڵام مەتین گورجان کارناسی پرسە ئەمنیەکان دەڵێت: ئۆپەراسیۆنی لقی زەیتوون پاش ئۆپەراسیۆنی قەڵغانی فورات دووهەمین ئۆپەراسیۆنی کاریگەری تورکیا لە سووریایە. ئۆپەراسیۆنی کاریگەر لە لایەن ئەرتەشی تورکیاوە بە ئۆپەراسیۆنێکی دەڵێن کە لە دۆخێکی سەخت و دژواردا بەڕێوەدەچێت و بۆ دەسکەوتێکی سیاسی ئەنجام دەدرێت، ئامانجی ئەو چەشنە ئۆپەراسیۆنە لە ناوبردنی فیزیکیی دوژمن نییە.

ناوبراو وتیشی: ئامانجی تورکیا لە ئۆپەراسیۆنی لقی زەیتوون لە عەفرین کاریگەری دانیانە لەسەر وڵاتانی دیکە کە لە تورکیا ڕۆڵ دەگێڕن لەوان ئەمریکا و ڕوسیا.

ئەو کارناسە زیادی کرد: ئامانجی دیکەی تورکیا لە هێرش کردنە سەر کانتۆنی عەفرین ئەوەیە کە پیشان بدات کە تورکیا لە باکووری سووریا هێشتا کایگەری هەیە و دەتوانێت دۆخی ناوچەکە لە بەرژەوندیی خۆی بگۆڕێت.

کۆدی هه‌واڵنێر: 60113