کوردپرێس:

ڕۆژی چوارشه‌ممه‌ 25-9-2019 له‌ هه‌ولێر نێچیرڤان بارزانى سه‌رۆکی هه‌رێمی کوردستان له‌گه‌ڵ مارشال بیلینگسلى یاریده‌ده‌ری وه‌زیرى گه‌نجینه‌ى ئه‌مریکى بۆ کاروبارى نه‌هێشتنى پاره‌دارکردنى تیرۆر کۆ بووه‌وه‌.

به‌پێی ڕاگه‌یێندراوێکی ماڵپه‌ڕی سه‌رۆکایه‌تیی هه‌رێمی کوردستان له‌ کۆبوونه‌وه‌که‌دا، په‌یوه‌ندییه‌کانى هه‌ولێر- به‌غدا و ده‌رفه‌تى کار و وه‌به‌رهێنان و سه‌رمایه‌گوزارى له‌ هه‌رێمى کوردستان و عێراق بۆ وه‌به‌رهێنه‌رانى بیانى و پێشکه‌شکردنى ئاسانکارى له‌مباره‌یه‌وه‌ تاوتوێ کرا.

هه‌روه‌ها سیسته‌مى بانکى و بانکدارى له‌ عێراق و هه‌رێمى کوردستان و چۆنیه‌تیى پێشخستن و به‌ستنه‌وه‌یان به‌ جیهان، هاوکارى و هه‌ماهه‌نگیى بانکى نێوده‌وڵه‌تى بۆ باشترکردنى که‌رتى ئابوورى و بانکدارى له‌ هه‌رێمى کوردستان و عێراق، دۆخى ئابووریى عێراق و هه‌رێمى کوردستان به‌گشتى و که‌رتى وزه به‌تایبه‌تى ته‌وه‌رێکی دیکه‌ی کۆبوونه‌وه‌که‌ بووه‌.

سه‌باره‌ت به‌ له‌ناوبردن و نه‌هێشتنى یه‌کجاریى داعش و "بیرى تیرۆریستى و توندڕه‌وانه‌" هه‌ردوولا "جه‌ختیان له‌ پێویستیى وشککردنى سه‌رچاوه‌ى دارایى داعش و ڕێگری کردنى ته‌واو له‌ بزاووت و چالاکییه‌ داراییه‌کانى و مه‌ترسیى سه‌رهه‌ڵدانه‌وه‌یان کرده‌وه‌ و بۆ ئه‌م مه‌به‌سته‌ هاوکارى و هه‌ماهه‌نگیى زیاترى نێوده‌وڵه‌تییان به‌ پێویست زانى".

له‌ کۆبوونه‌وه‌که‌دا کۆنسووڵى گشتیى ئه‌مریکا و شاندێکى یاوه‌ریشیان به‌شدار بوون و گفتوگۆى حکومه‌تى هه‌رێمى کورستان و حکوومه‌تى عێراق بۆ چاره‌سه‌رکردنى کێشه‌کان، بارزگانیى هه‌رێمى کوردستان و عێراق له‌گه‌ڵ وڵاتانى دراوسێ و ناوچه‌که‌ چه‌ند ته‌وه‌رێکى دیکه‌ى گفتوگۆى هه‌ردوولا بوون.

کۆدی هه‌واڵنێر: 60103