کوردپرێس:
ئانتۆنیۆ گۆتێرێس سکرتێری گشتیی نه‌ته‌وه یه‌کگرتووه‌کان باسی له هه‌نگاوه‌کانی ئه‌مدواییه بۆ پێکهێنانی کۆمیته‌ی ده‌ستووری سووریا کرد و گوتی: کۆمیته‌که پێکهێنراوه و له هه‌فته‌كانی ئاینده‌دا له جنێڤ كۆ ده‌بنه‌وه.
گوتیرێس له ڕوونكردنه‌وه‌یێكدا بۆ رۆژنامه‌نووسان له ناوه‌ندی گشتیی نه‌ته‌وه یه‌كگرتووه‌كان ئاماژه‌ی به‌وه کرد که ده‌وڵه‌تی سووریا و ئۆپۆزسیۆن له‌باره‌ی كۆمیته‌ی ده‌ستووره‌وه گه‌یشتوونه‌ته ڕێككه‌وتن و له هه‌فته‌كانی ئاینده‌دا كۆمیته‌یێكی متمانه‌پێكراو، هاوسه‌نگ و گشتگیر له ژێر چاودێریی نه‌ته‌وه یه‌كگرتووه‌كاندا له جنێڤ كۆ ده‌بێته‌وه و پێویسته پێکهێنانی كۆمیته‌ی ده‌ستوور ده‌ستپێكی قۆناغی سیاسی بێت.
گوتیرێس ڕاشی‌گه‌یاند: پێویسته له‌گه‌ڵ پێکهێنانی كۆمیته‌كه‌دا چالاكیی به‌رجه‌سته ئه‌نجام بدرێت و سوپاسی هه‌ر یه‌كه له توركیا، ڕووسیا و ئێرانی كرد بۆ هاوكارییه‌كانیان له‌م قۆناغه‌دا.
شایانی باسه؛ له‌باره‌ی ئه‌وه‌ی که ئایا ئه‌نجومه‌نی سووریا دیموکرات و پارتی یه‌کێتیی دیموکراتی سووریا (PYD) وه‌ک نوێنه‌ری کورده‌کان له‌و کۆمیته‌یه‌دا ده‌بن یان نا هیچ هه‌واڵێک تاکوو ئێستا بڵاو نه‌کراوه‌ته‌وه.
سه‌رچاوه: هه‌واڵده‌ریی ئه‌نادۆڵو
کۆدی هه‌واڵنێر: 60103
Your Comment