فه‌رهاد ته‌جه‌ری له گفتوگۆ له‌گه‌ڵ هه‌واڵنێری کوردپرێس ڕه‌خنه‌ی له به‌ڕێوه‌به‌رایه‌تیی لاواز له دابه‌ش کردنی خێوه‌ت و که‌ره‌سته‌ی پێویست له نێوان لێقۆماوانی بوومه‌له‌رزه گرت و ڕای‌گه‌یاند: سه‌ره‌ڕای تێپه‌ڕبوونی 6 ڕۆژ له ڕووداوی بوومه‌له‌رزه‌ی کرماشان، هێشتاکه بۆ دابه‌ش کردنی خێوه‌تی مانگی سوور و دیکه‌ی پێداویستییه‌کان له نێوان لێقۆماوانی بوومه‌له‌رزه کێشه‌مان هه‌یه.
ناوبراو وتیشی: به هه‌وڵی به‌رپرسان و هیممه‌تی خه‌ڵکی ئێران تێکڕای پێداویستیی خوارده‌مه‌نی، ئاو و که‌ره‌سته‌ی ته‌ندروستی بۆ بوومه‌له‌رزه‌لێدراوان دابین کراوه.
ئه‌ندامی کۆمه‌ڵه‌ی نوێنه‌رانی پارێزگای کرماشان جه‌ختی کرده‌وه: له هه‌مان کاتژمێره سه‌ره‌تاییه‌کان سه‌رجه‌م برینداران له ناوچه‌که برانه ده‌ره‌وه و مۆڵه‌تی ناشتن بۆ قوربانیانیش ده‌رکرا.
ناوبراو خێوه‌ت و به‌تانی به پێداویستیی سه‌ره‌کیی لێقۆماوانی بوومه‌له‌رزه وه‌سف کرد.
ته‌جه‌ری ڕاشی‌گه‌یاند: سه‌ره‌ڕای داکۆکیی سه‌رۆک کۆمار له‌سه‌ر دابه‌ش کردنی خێرای خێوه‌ت له نێوان بوومه‌له‌رزه‌لێدراوان، به بۆنه‌ی ده‌ستی ده‌ستی کردنی مانگی سووره‌وه نه‌مانتوانیوه خێوه‌تی پێویست ڕاده‌ستی لێقۆماوان بکه‌ین.
ناوبراو له کۆتاییدا جه‌ختیشی کرده‌وه: به‌و ڕێوشوێنانه‌ی به‌رپرسانی پارێزگا و وڵات گرتوویانه‌به‌ر، له ماوه‌ی 24 کاتژمێری داهاتوودا سه‌رجه‌م بوومه‌له‌رزه‌لێدراوان نیشته‌جێ ده‌کرێن.
کۆدی هه‌واڵنێر: 60103
Your Comment