به‌پێی هه‌واڵی کوردپرێس، ئیبراهیم کالین وته‌بێژی سه‌رۆک کۆماری تورکیا وتی: تاکوو ئێستا هه‌نارده کردنی نه‌وتی عێراق له ڕێگای ئه‌و هێڵه گواستنه‌وه نه‌بڕاوه که له تورکیاوه تێده‌په‌ڕێت و داهاته‌که‌ی بۆ حکوومه‌تی ناوه‌ندیی عێراق ده‌گوازرێته‌وه به‌ڵام به‌غدا پشکی 17 له‌سه‌دی هه‌ولێر له‌و داهاته ده‌دات.
ناوبراو وتیشی: "به‌غدا پشکی 17 له‌سه‌دی هه‌ولێر ده‌دات. پێمان گوتن كار به‌و میكانیزمه بكه‌ن. ئێستا هه‌وراز و نشێوێک له په‌یوه‌ندییه‌كانی هه‌ولێر و به‌غدادا هه‌یه. رۆژێک ده‌وترێت له كۆبوونه‌وه‌دان، ڕۆژی دواتر ده‌وترێت په‌یوه‌ندییه‌كان پچڕاون. ڕه‌وشێكی دژوار هه‌یه و له‌وه تێده‌گه‌ین."
ئه‌وه له حاڵێکدایه که ڕاگه‌یێندراوه ده‌سته‌ی وه‌زیرانی عێراق پشکی هه‌رێمی کوردستانی له بودجه‌ی 2018 به 12.8% ڕاگه‌یاندووه.
ناوبراو له‌باره‌ی پاشهاته‌کانی به‌ڕێوه‌چوونی گشتپرسی سه‌ربه‌خۆییی هه‌رێمی کوردستان جه‌ختی کرد: "به ئه‌نجامدانی ئه‌و پرۆسه‌یه هه‌رێم زنجیره‌یێک گه‌مارۆی له‌سه‌ر دانرا كه داخستنی سنووری ئاسمانی و هه‌ڵپه‌ساردنی په‌یوه‌ندییه‌كان بوو به‌ڵام ئێمه وتمان نامانه‌وێت کارێک بكه‌ین هاووڵاتییانی هه‌رێمی کوردستان زیانیان به‌ر بكه‌وێت."
ناوبراو له درێژه‌شدا له‌باره‌ی ده‌روازه‌ی سنووریی خاپوور- ئیبراهیم خه‌لیلیش وتیشی: "ئێمه به هه‌ماهه‌نگی له‌گه‌ڵ به‌غدا وتمان یان ده‌روازه‌ی سنووریی ئیبراهیم خه‌لیل ڕاده‌ستی به‌غدا بكه‌نه‌وه یان پێكه‌وه به‌ڕێوه‌ی به‌رن. گه‌ر واتان کرد ئه‌وکاته بابه‌ته‌كه‌ی هی ئێوه‌یه و په‌یوه‌ندیی به ئێمه‌وه نییه، کارێک نه‌که‌ن ئێمه ده‌روازه‌كه دابخه‌ین. چه‌ند ڕۆژێكیشه هه‌ندێ هه‌واڵی دژبه‌یه‌ک بڵاو ده‌کرێته‌وه، هه‌ندێک ده‌ڵێن ده‌روازه‌که له‌لایه‌ن به‌غداوه کۆنتڕۆڵ ده‌کرێته‌وه و هه‌ندێکی دیکه ڕه‌تی ده‌که‌نه‌وه. ئه‌گه‌ر به هاوكێشه‌یێک كه حكوومه‌تی به‌غدایش پێی ڕازی بێت ڕێكبكه‌ون ده‌روازه‌ی سنووریی خابوور داناخه‌ین."
کالین جه‌ختیشی کرد: ئێستاکه ده‌روازه‌ی سنووریی ئیبراهیم خه‌لیل كراوه‌یه و له‌وێوه ناردنی پێداویستی و به‌رهه‌مه‌كان به‌رده‌وامه.
سه‌رچاوه: ڕادیۆ نه‌وا
کۆدی هه‌واڵنێر: 60103
Your Comment