بەپێی هەواڵی کوردپرێس، وەزارەتی ناوخۆی تورکیا رایگەیاند تا ئەم ساتە، 43 هەزار و 556 کەس لە تورکیا بەهۆی بوومەلەرزەوە گیانیان لەدەستداوە، هاوکات لە سووریا ژمارەی گیان‌لەدەست‌دان بەهەمان هۆکار 6 هەزار و 747 کەسی تێپەڕاند.

ماڵپەڕی سەرۆکایەتیی کارەساتی لەناکاو و فریاگوزاریی تورکیا (ئافاد) لە راگەیەندراوێکدا گوتی، دوای بوومەلەرزە گەورەکەی 6ـی شوباتی ئەمساڵ، 7 هەزار و 241 پاشلەرزە روویانداوە، لەنێویاندا 41ـیان بەهێزبوون.

ئافاد دووپاتی کردەوە بەردەوامن لە گەیاندنی چادر و خێوەت بۆ ناوچە زیانبەرکەوتووەکان و تاوەکوو ئیستاش 300 هەزار و 809 خێوەتیان بەسەر 270 ناوچە دابەش کردووە.

هەروەها بەگوێرەی روانگەی سووری بۆ مافەکانی مرۆڤ، ژمارەی قوربانیانی بوومەلەرزەکەی سووریا 6 هەزار و 747 کەسی تێپەراند، ئاژانسەکە ئاماژەی بەوەش کردووە، ژمارەی ئەو سووریانەی لە ئەنجامی بوومەلەرزە لە تورکیا گیانیان لەدەستداوە، زیاتر لە 1هەزار و 793 کەسە.