بەپێی هەواڵی کوردپرێس، زیره‌ک که‌مال ڕاوێژکاری سەرۆکی هەرێم ئاشکرایکرد، سەرۆکی هەرێم دەستپێشخەریی هەیە، بۆ ئەوەی ناوماڵی کوردی یەکبخرێت ‌و ئێستاش سەرقاڵی زەمینەسازییە.

ناوبراو ده‌شڵێت: "سەرۆکی هەرێم دەستپێشخەریی هەیە، بۆ ئەوەی لایەنەکان پێکەوە کۆ ببنەوە و ناوماڵی کوردی یەکبخرێت، چونوکە یەکخستنی ناوماڵی کوردی زۆر پێویستە و دەستکەوتەکانمان پارێزراو دەبن‌ و سەنگی کوردیش زیاتر دەبێت، بۆیە گرنگە کورد یەکگرتووبن، لەئێستاشدا ئامادەسازیی دەکرێت بۆ ئەوەی هەنگاوی کرداری بنرێت بۆ کۆبوونەوەی لایەنەکان".

به‌وته‌ى زیره‌ک که‌مال: "دۆستانمان لەسەر ئاستی هەرێمی‌ و نێودەوڵەتیش بەتایبەت ئەمریکا، داوای یەکڕیزیمان لێدەکەن، بۆ ئەوەی قەوارەی هەرێم پارێزراو بێت ‌و کێشەکانمان بەیەکگرتوویی لەسەر ئاستی ناوخۆیی ‌و دەرەوەش چارەسەربکەین".

له‌باره‌ى هه‌وڵه‌که‌ى سه‌رۆکى هه‌رێمیشه‌وه‌، ڕاوێژکاره‌که‌ى بارزانى ده‌ڵێت: "سه‌رۆکى هه‌رێم دەیەوێت دەرفەتێکی باش بڕەخسێت بۆ کۆبوونەوە و یەکخستنی ناوماڵی کوردی، چوونکە هەمووان دەیانەوێت بەیەک تیم ڕووبەڕووی کێشەکان ببینەوە و چارەسەریان بکەین، بۆیە گرنگە لایەنەکان پێکەوە کۆ ببنەوە و کێشەکان چارەسەربکەن".