به‌پێی هه‌واڵی کوردپرێس، سکرتێکری گشتیی ڕێکخراوی نه‌ته‌وه‌ یه‌کگرتووه‌کان ڕاپۆرتێکی له‌ژێر ناوی "منداڵان و پێکدادانی سه‌ربازی" بڵاو کرده‌وه‌ و تێیدا ڕه‌خنه‌ی له‌ سوپای سووریای دیموکرات گرت به‌بۆنه‌ی به‌کارهێنانی منداڵان وه‌ک هێزی سه‌ربازی له‌ ڕیزه‌کانی و ڕای‌گه‌یاند: له‌ ساڵی 2018ی زایینیدا سوپای سووریای دیموکرات زیاترین منداڵی وه‌ک هێزی سه‌ربازی به‌ خزمه‌ت گرتووه‌ و تاوه‌کوو ئێستا ئاماری 806 منداڵی سه‌رباز له‌ سووریا له‌ به‌رده‌ستدایه‌ که‌ 313 منداڵیان له‌ ڕیزه‌کانی سوپای سووریای دیموکرات چالاکی ده‌که‌ن.

ڕێکخراوی نه‌ته‌وه‌ یه‌کگرتووه‌کان له‌ ڕاپۆرته‌که‌یدا باس له‌وه‌ ده‌کات: کچه‌کان 40 له‌سه‌دی ئه‌و منداڵانه‌ پێکده‌هێنن که‌ وه‌ک هێزی سه‌ربازی له‌ ڕیزه‌کانی سوپای سووریای دیموکرات چالاکی ده‌که‌ن و 20 له‌سه‌دی ئه‌و کچانه‌ ته‌مه‌نیان خوار 15 ساڵه‌ و 119 که‌س له‌و هێزه‌ سه‌ربازییه‌ کچانه‌ ئاماده‌بوونێکی کارایان له‌ پێکدادانه‌ سه‌ربازییه‌کاندا هه‌یه‌.

هه‌روه‌ها له‌ ڕاپۆرته‌که‌دا باس له‌وه‌ کراوه‌ که‌ دوای سوپای سووریای دیموکرات گرووپی تیرۆریستیی ته‌حریرولشام 187 منداڵی سه‌رباز و سوپای ئازادی سووریا 170 منداڵی سه‌ربازیان له‌ سووریا به‌ خزمه‌ت گرتووه‌ که‌ زیاترین هێزی منداڵ له‌ ڕیزه‌کانیاندا‌یه‌.

سه‌رچاوه‌: هه‌واڵده‌ریی KRDnews

کۆدی هه‌واڵنێر: 60103