کوردپرێس:
ئه‌بوو عه‌لی ئه‌لبه‌سری سه‌رۆکی شانۆی هه‌ڵۆی هه‌واڵگریی ئه‌لسقوور و به‌ڕێوه‌به‌ری گشتیی هه‌واڵگری و به‌ره‌نگاربوونه‌وه‌ی تیرۆریزم له وه‌زاره‌تی ناوخۆی عێراق به ڕۆژنامه‌ی سه‌باحی نیمچه‌فه‌رمی وتووه: له ئۆپه‌راسیۆنێكماندا گه‌وره‌ترین پیلانی تیرۆریستیمان بۆ سه‌ر به‌غدا، هه‌ولێر و پارێزگاکانی‌تری وڵات له مانگی پیرۆزی ڕه‌مه‌زان پووچه‌ڵ کرده‌وه كه گه‌وره‌ترین هه‌ڵمه‌تی تیرۆریستی بووه له‌مساڵدا.
ناوبراو وتیشی: شانه‌ی هه‌واڵگریی ئه‌لسقوور به هاوئاهه‌نگی له‌گه‌ڵ به‌ڕێوه‌به‌رایه‌تیی هه‌واڵگریی ناوخۆیى له پارێزگاكان توانیی چه‌ندین بنکه‌ی تیرۆریستان دیارى بكات و له ڕێگه‌ى هێرشی ئاسمانى و شه‌ڕى ڕاسته‌وخۆوه له‌ناویان ببات.
ئه‌لبه‌سری زیادی کرد: له ئۆپه‌راسیۆنه‌كه‌دا 160 كه‌س له نه‌ینه‌وا و زیاتر له 40 كه‌س له به‌غدا و 4 كه‌س له به‌سڕه ده‌ستگیر كران كه ئاماده‌كرابوون بۆ خۆته‌قاندنه‌وه له ڕێگه‌ى پشتێن و ئۆتۆمبێلى بۆمبڕێژكراوه‌وه له به‌غدا و هه‌ولێر و به‌سڕه و پارێزگا ئازادكراوه‌كان.
به‌ڕێوه‌به‌ری گشتیی هه‌واڵگری و به‌ره‌نگاربوونه‌وه‌ی تیرۆریزم له وه‌زاره‌تی ناوخۆی عێراق ده‌ستخۆشی له هاوکاریی داموده‌زگاکانی ئاسایشی هه‌رێمی کوردستان کرد به بۆنه‌ی هاوکاری‌کردنیان له پڕۆسه‌ی ده‌ستگیرکردنی تاوانباران که ده‌یانویست له مانگی ڕه‌مه‌زاندا پیلانه تیرۆریستییه‌که‌یان جێبه‌جێ بکه‌ن.
کۆدی هه‌واڵنێر: 60103
Your Comment