به‌پێی هه‌واڵی کوردپرێس، ئه‌مڕۆ دووشه‌ممه‌ 22ی ته‌مووزی 2019 جه‌یمز جێفری نوێنه‌ری تایبه‌تی دۆناڵد تره‌مپ سه‌رۆک کۆماری ئه‌مریکا بۆ کاروباری سووریا له‌سه‌ر بانگهێشتی فه‌رمیی به‌رپرسانی تورکیا و به‌ مه‌به‌ستی لێکدانه‌وه‌ی قه‌یرانی سووریا له‌گه‌ڵ به‌رپرسانی ئه‌و وڵاته‌ گه‌یشته‌ ئه‌نقه‌ره‌.

بڕیاره‌ ڕۆژانی 22 و 23ی ته‌مووزی 2019 جه‌یمز جێفری له‌گه‌ڵ به‌رپرسانی تورکیا سه‌باره‌ت به‌ نیگه‌رانییه‌ ئه‌منییه‌کانی ئه‌نقه‌ره‌ له‌باره‌ی قه‌یرانی سووریا، جێبه‌جێ‌کردنی بڕیارنامه‌ی ئه‌نجومه‌نی ئاسایشی نه‌ته‌وه‌ یه‌کگرتووه‌کان له‌سه‌ر چاره‌کردنی قه‌یرانی سووریا، شکست‌هێنانی به‌ته‌واوه‌تی داعش و دواپێشهاته‌کانی ناوچه‌که‌ دانووستان و ڕاگۆڕینه‌وه‌ بکات.

شایانی باسه‌؛ هاوکات له‌گه‌ڵ سه‌ردانه‌که‌ی جه‌یمز جێفری بۆ تورکیا شاندێکی ئه‌مریکییش سه‌ردانی تورکیایان کردووه‌ بۆ ئه‌وه‌ی له‌گه‌ڵ به‌رپرسانی باڵای وه‌زاره‌تی به‌رگری و ده‌ره‌وه‌ی ئه‌و وڵاته‌ هه‌ندێک بابه‌ت تاوتوێ بکه‌ن له‌وان؛ پێکهێنانی کارگرووپی هاوکاریی تورکیا- ئه‌مریکا له‌سه‌ر گۆڕانکارییه‌کانی ئه‌مدواییه‌ سه‌باره‌ت به‌ وه‌رگرتنی سیسته‌می مووشه‌کیی ئێس-400ی ڕووسی له‌لایه‌ن تورکیا و فڕۆکه‌ی شه‌ڕکه‌ری ئێف-35ی ئه‌مریکی.

سه‌رچاوه‌: هه‌واڵده‌ریی ئه‌نادۆڵو

کۆدی هه‌واڵنێر: 60103