بەپێی هەواڵی کوردپرێس، لە دیدارەكەدا، کونسوڵی گشتیی بەریتانیا لە هەرێمی کوردستان ڕایگەیاند کە بەبۆنەی کۆتایی هاتنی ئەرکەکەی لە هەرێم هاتووە تا سوپاسگوزاریی خۆی پێشکەش بە بارزانی بکات و خۆشحاڵیی خۆی بە ماوەی کارکردنی لە هەرێم ڕاگەیاند و ستایشی ئەو هەماهەنگی و هاوکارییەی کرد کە لەماوەی کارکردنیدا لەگەڵ دەزگاکانی حکوومەتی هەرێم بەدی کردووە. هەروەها هیوای خواست پەیوەندییەکانی وڵاتەکەی لەگەڵ هەرێمی کوردستان زیاتر پەرەبستێنێت.

سەرۆکی پارتی دیموکراتی کوردستان سوپاسی کونسوڵی گشتیی بەریتانیای کرد و هیوای سەرکەوتنی لە ئەرکە نوێیەکەیدا بۆ خواست.

هەر لە دیدارەکەدا بیروڕا لەبارەی دوایین پێشهاتە سیاسییەكان لە ئاستی نێودەوڵەتی و ناوچەیی و هەروەها پڕۆسەی سیاسیی عێراق و پەیوەندییەکانی نێوان هەرێم و بەغدا ئاڵوگۆڕ كرا.

هەروەها باسی بەردەوامیی هەڕەشە و مەترسییەكانی داعش لەسەر ئاساییشی عێراق و ناوچەكە کرا و جەخت کرایەوە کە ڕووبەڕووبوونەوەی ئەو مەترسییە ئەرکێکی هەمەلایەنەیە.

لە بەشیکی دیکەی دیدارەکەی نێوانیاندا پێشڤەچوونی پڕۆسەی سیاسیی هەرێم خرایە بەرباس.

کۆدی هەواڵنێر: 60113