کوردپرێس:
ئه‌مڕۆ یه‌كشه‌ممه 23-6-2019 مه‌سروور بارزانی ڕاوێژكاری ئه‌نجومه‌نی ئاسایش و ڕاسپێردراوی پێكهێنانی كابینه‌ی نوێی حكوومه‌تی هه‌رێمی كوردستان پێشوازیی له شاندێكی گرووپی هه‌موو پارته‌كانی په‌رله‌مانی به‌ریتانیا بۆ دۆستایه‌تیی هه‌رێمی كوردستان به سه‌رۆكایه‌تیی جاک لۆپرێستی سه‌رۆكی گرووپی هه‌موو پارته‌كانی په‌رله‌مان و ئه‌ندامێتی ستیڤ رید، تۆبی پێركینس و گاری كێنت به‌ڕێوه‌به‌ری گرووپی كوردستان له په‌رله‌مانی به‌ریتانیا كرد.
له‌و دیداره‌دا مه‌سروور بارزانی ده‌ستخۆشی له‌و گرووپه‌ی په‌رله‌مانتارانی به‌ریتانیا كرد بۆ هاوكاری و پشتگیرییه‌كانیان له هه‌رێمی كوردستان و باسی له هه‌نگاوه‌كانی پێكهێنانی كابینه‌ی نوێی حكوومه‌ت كرد.
هه‌ر له‌و دیداره‌دا گفتوگۆ له‌باره‌ی ئه‌و ژماره زۆره‌ی ئاواره و په‌نابه‌ران له هه‌رێمی كوردستان كرا و جه‌خت له‌وه كرایه‌وه كه پێویسته كۆمه‌ڵگه‌ی نێوده‌وڵه‌تی هه‌وڵه‌كانی خۆی بۆ پێشكه‌ش كردنی یارمه‌تییه مرۆییه‌كان چڕتر بكاته‌وه.
له‌لای خۆیه‌وه شاندی گرووپی هه‌موو پارته‌كانی په‌رله‌مانی به‌ریتانیا جه‌ختیان له به‌رده‌وامیی په‌یوه‌ندییه‌كانی نێوان هه‌رێمی كوردستان و به‌ریتانیا كرده‌وه و مه‌به‌ستی سه‌ردانه‌كه‌شیان ڕوون كرده‌وه كه له‌لایێک هانی وه‌به‌رهێنه‌رانی به‌ریتانیا ده‌ده‌ن ڕوو له هه‌رێمی كوردستان بكه‌ن و له‌لایێكی دیكه‌وه ده‌یانه‌وێت لێكۆڵینه‌وه له‌باره‌ی چۆنێتیی هاوكاریكردنی په‌نابه‌ران و ئاواره‌كان بكه‌ن.
له كۆتایی دیداره‌كه‌دا وێڕای به‌ئاوات خواستنی سه‌ركه‌وتن بۆ مه‌سروور بارزانی له ئه‌ركی نوێدا ئاماده‌ییی خۆشیان بۆ پشتیوانی كردن له كابینه‌كه‌ی ده‌ربڕی له میانه‌ی هاندانی سه‌رمایه‌دارانی به‌ریتانیا و به‌شداری كردنیان له به‌ره‌وپێشه‌وه‌بردنی بواری ئابووری و پێشكه‌ش كردنی پسپۆڕی بۆ بواره جیاكانی هه‌رێمی كوردستان.
کۆدی هه‌واڵنێر: 60103
Your Comment