به‌پێی هه‌واڵی کوردپرێس، هاوکات له‌گه‌ڵ ده‌ست پێکردنی ئۆپه‌راسیۆنی سوپای تورکیا دژی په‌که‌که‌ له‌ باکووری عێراق، ئۆپه‌راسیۆنی هێزه‌کانی ئه‌و وڵاته‌ له‌ ناو سنووره‌کان دژی په‌که‌که‌ له‌ پارێزگا کوردنشینه‌کان به‌رز بۆته‌وه‌ و هه‌ندێک ده‌نگوباس له‌باره‌ی پێکدادانی نێوان دوو لایه‌ن بڵاو کراوه‌ته‌وه‌.

به‌ گوێره‌ی ئه‌و زانیارییانه‌ی ده‌ست که‌وتووه‌، له‌ ئۆپه‌راسیۆنی هێزه‌کانی سوپای تورکیا له‌ دۆڵی جه‌هه‌نه‌می سه‌ر به‌ پارێزگای کوردنشینی شڕناخ 8 ئه‌ندامی په‌که‌که‌ له‌لایه‌ن هێزه‌ ئه‌منییه‌کانی تورکیاوه‌ کوژران.

وه‌زاره‌تی ناوخۆی تورکیا باسی له‌وه‌ کرد: هێزی جه‌ندرمه‌ی تورکیا له‌ ئۆپه‌راسیۆنێکدا له‌ژێر ناوی "شه‌هید مسته‌فا کالفه‌" بنکه‌ و باره‌گای په‌که‌که‌ له‌ دۆڵی جه‌هه‌ننه‌می شڕناخی کردۆته‌ ئامانج که‌ له‌ ئۆپه‌راسیۆنه‌که‌دا 3 هێزی په‌که‌که‌ کوژران و به‌ گشتی ژماره‌ی کوژراوانی ئه‌و گرووپه‌ بۆ 8 که‌س به‌رز بۆته‌وه‌.

هه‌روه‌ها پارێزگاریی جۆله‌مێرگی باشووری ڕۆژهه‌ڵاتی تورکیا بڵاوی کردۆته‌وه‌ که‌ به‌مه‌به‌ستی ئه‌نجامدانی ئۆپه‌راسیۆنی سه‌ربازی دژی په‌که‌که‌ له‌و پارێزگا کوردنشینه 15 ڕۆژ‌ دۆخی نائاسایی له‌ 5 ناوچه‌ی جۆراوجۆری پارێزگاکه‌ ڕاگه‌یێندراوه‌ و به‌و بۆنه‌شه‌وه‌ هێزه‌ ئه‌منییه‌کانی تورکیا ئۆپه‌راسیۆنێکی به‌رفراوانیان له‌ ناوچه‌که‌ ده‌ست پێکردووه‌.

سه‌رچاوه‌: ڕۆژنامه‌ی هابرتورک

کۆدی هه‌واڵنێر: 60103