بەپێی هەواڵی کوردپرێس، لەمیانەی دیداری سلێمانی كە ئەمڕۆ چوارشەممە 6ی 3ی 2019 لە زانکۆی ئەمریکی ئەم شارە بەڕێوەچوو قوباد تاڵەبانی جێگری سەرۆكی حكوومەتی هەرێم ئاماژەی بەدۆخی عێراق و هەرێم و جەنگی ڕووبەڕووبوونەوەی داعش كرد.

ناوبراو هەروها ئاماژەی بەژیانی خەڵک و خزمەتگوزاریی كرد و وتی:"خەڵكی عێراق و هەرێمی كوردستانیش چاوەڕوانی حوكمڕانیێكی باشترن لە حكوومەتەكەیان، ئێستاش حكوومەتێكی نوێ لە بەغدا هەیە، ژینگەی سیاسی گۆڕاوە".

قوباد تاڵەبانی ئەوەشی ڕوونكردەوە: پەیوەندیێكی بەهێز لە نێوان حكوومەتی هەرێم و عێراق هەیە و کێشە و ناکۆکییەکانی نێوان حکوومەتی هەرێم و حکوومەتی فیدراڵ هەروولای ماندوو کردووە.

جێگری سەرۆک وەزیرانی هەرێمی کوردستان ئاماژەی بەوەش كرد بەپابەندبوونی هەردوو حكوومەتی عێراق و هەرێمیش بۆ باشتركردنی پەیوەندیی و پێكەوە كاركردنی چارەسەركردنی كێشەكان، دەرفەت دەڕەخسێت بۆ خۆشگوزەرانی خەڵكی عێراق و هەرێمی كوردستانیش".

تاڵەبانی ئەوەشی وت: "لەبەردەم چوار ڕیانێكداین، ڕێگە كۆنەكە بەرەو نەهامەتی دەمانبات، یان ڕێگەی نوێ هەڵبژێرین دەمانبات بۆ ئارامی".

قوباد تاڵەبانی تەئكیدی كردەوە باشتر كردنی خزمەتگوزاریی و حوكمڕانی و شەفافیەت بەقسە ئاسانە، بەڵكوو بەكردەوە گرانە، بۆیە پێویستە لایەنەكان كاتێک تەرخان بكەن بۆ ئەو بابەتانەی پەیوەندیان بەژیانی ڕۆژانەی هاوڵاتیان هەیە و نەخشەڕێگایێک بۆ چارەسەری كێشە گرنگەكان ئامادە بكەن".

سەرچاوە: شەفەق نیووز

کۆدی هەواڵنێر: 60113