به‌پێی هه‌واڵی کوردپرێس، ئه‌مڕۆ چوارشه‌ممه 6ی ئاداری 2019 د. به‌رھه‌م ساڵح سه‌رۆک کۆماری عێراق له میانی پانێلێکدا له شه‌شه‌مین دیداری سلێمانیدا له‌باره‌ی چه‌ند پرسێکی تایبه‌ت به عێراق و ناوچه‌که‌وه دوا و ڕای‌گه‌یاند: "ئه‌و سه‌رکه‌وتنه‌ی به‌رامبه‌ر داعش به‌ده‌ستھات سه‌رکه‌وتنێکی گرنگه به‌ڵام تا ئێستا چه‌ند شانه‌یێکی داعش له عێراق و سووریا ماون و مه‌ترسیی تێرۆر و داعش ریشه‌کێش نه‌کراون".
ناوبراو ئاماژه‌ی به‌وه‌ش کرد: "ڕه‌نگه داعش ھه‌لێک بدۆزێته‌وه بۆ خۆڕێکخستنه‌وه‌ی به‌تایبه‌ت له سووریا و بۆ که‌مکردنه‌وه‌ی مه‌ترسیی تیرۆریش پێویسته بارودۆخی سیاسی ڕێکبخرێته‌وه".
سه‌رۆک کۆمار له‌باره‌ی بوونی گه‌نده‌ڵی له عێراقدا گوتیشی: "گه‌نده‌ڵی کاره‌کان په‌کده‌خات، ئه‌گه‌ر گه‌نده‌ڵی له ناو نه‌به‌ین ناتوانین ڕووبه‌ڕووی توندوتیژی ببینه‌وه، پرسی گه‌نده‌ڵی به دروشم چاره‌سه‌ر ناکرێت، له وه‌رزی دووه‌می یاسادانانی ئه‌نجومه‌نی نوێنه‌ران میکانیزمی نوێ بۆ له‌ناوبردنی گه‌نده‌ڵی ده‌خرێته‌ڕوو و ھیوادارم ئه‌وه‌ی له تواناماندایه ئه‌نجامی بده‌ین بۆ ڕووبه‌ڕووبوونه‌وه‌ی گه‌نده‌ڵی".
به‌رھه‌م ساڵح ڕوونی کرده‌وه: "عێراق به‌ره‌و گۆڕانکاری ئابووری گه‌وره ھه‌نگاو ده‌نێت و له‌توانایدایه وه‌به‌رھێنانی گه‌وره بکات و ئێستا عێراق بوووه‌ته پردێک بۆ ئابووریی ناوچه‌که و ئه‌گه‌ر عێراق ھه‌ره‌س بھێنێت ناوچه‌که ھه‌ره‌س ده‌ھێنێت".
سه‌رکۆماری عێراق له‌باره‌ی قه‌یرانی ھه‌شت ساڵه‌ی سووریاوه زیادی کرد: ئه‌وه‌ی له سووریا ڕووی دا کاره‌ساتێکی گه‌وره بوو بۆ ئه‌و وڵاته و ناوچه‌که، ڕه‌وشی سووریا به‌رگه‌ی دواکه‌وتنی زیاتر ناگرێت و عێراق پشتگیریی چاره‌سه‌ری سیاسی بۆ قه‌یرانی سووریا ده‌کات.
کۆدی هه‌واڵنێر: 60103
Your Comment