به‌پێی هه‌واڵی کوردپرێس، به‌رهه‌م ساڵح له وته‌یێكدا له كاتى به‌ڕێوه‌چوونی چالاكییه‌كانى كۆنگره‌ی ساڵانه‌ى دیدارى ڕافیده‌ین له شاری به‌غدا کاردانه‌وه‌ی به لێدوانی ئه‌مدواییه‌ی دۆناڵد تره‌مپ نیشان دا و وتى: "تووشی سه‌رسوڕمان بووین له وته‌كانى دۆناڵد تره‌مپ تایبه‌ت به مانه‌وه‌ی هێزه‌كانیان له عێراق و چاودێری كردنی ئێران چوونكه ئه‌و هێزانه مافى ئه‌وه‌یان نییه له عێراقدا هیچ شتێک بكه‌ن به بێ ڕێككه‌وتنى واژۆكراو".
سه‌رۆک كۆمارى عێراق ده‌ڵێت: هێزه‌كانى ئه‌مریكا مافى ئه‌وه‌یان نییه چاودێرى زۆر شت بكه‌ن له‌وانه‌ش ئێران و ڕێگه به شتێكى له‌و جۆره ناده‌ین.
ناوبراو جه‌ختی کرده‌وه: هێزه‌کانی ئه‌مریکا به‌پێی ڕێککه‌وتنی واژۆکراوی نێوان دوو وڵات له عێراقن و ڕاسپێردراوییان به‌ره‌نگاربوونه‌وه‌ی تیرۆریزمه.
به‌رهه‌م ساڵح زیادی کرد: عێراق نایه‌وێت ببێته لایه‌نێک له ململانێكانی نێوان چه‌ند وڵات له ناوچه‌که.
سه‌رۆک کۆماری عێراق ئاماژه‌ی به‌وه کرد که ئێمه چاوه‌ڕوانی ڕوونکردنه‌وه‌ی واشنتۆنین له‌باره‌ی ڕاسپێردراوی و ژماره‌ى هێزه‌كانیان له عێراق.
به‌رهه‌م ساڵح ئاماژه به‌وه ده‌کات که ئه‌ركى ئێمه ئه‌وه‌یه گه‌شه به په‌یوه‌ندییه‌كانمان بده‌ین له‌گه‌ڵ وڵاتانی دراوسێ له ناویشیاندا ئێران و پێشبینیشی کرد که عادل عه‌بدولمه‌هدی سه‌رۆک وه‌زیرانی عێراق له ده‌سته‌به‌رکردنی به‌رنامه‌کانی خۆیدا سه‌رکه‌وتوو بێت.
سه‌رۆک کۆماری عێراق ڕاشی‌گه‌یاند: شکستپێهێنانی داعش و پێکهێنانی ده‌وڵه‌تی نوێی عێراق گۆڕانکارییێکی چاره‌نووسسازه نه‌ک ته‌نیا بۆ عێراق به‌ڵکوو بۆ ناوچه‌که.
سه‌رچاوه: هه‌واڵده‌ریی سۆمه‌ریه نیووز
کۆدی هه‌واڵنێر: 60103
Your Comment