کوردپرێس:

سەرچاوەیێکی ئاگاداری سیاسی ئاماژەی بە لێکتێگەیشتنی باشی نێوان یەکێتی و پارتی کردووە و بەو پێیەش وتوویەتی دوور نییە شاندی پارتی بە سەرۆکایەتیی مەسعوود بارزانی لەگەڵ بەرهەم ساڵح سەرۆککۆماری عێراق دیدار بکات.

ناوبراو گوتیشی پاش ناکۆکییەکان لیژنەیێکی هاوبەش بۆ لێکتێگەیشتنی نزیک پێکهێنراوە کە ئەندامانی شاندەکە بریتین لە ڕۆژ نووری شاوەیس و هۆشیار زێباری و مەحموود موحەمەد لە پارتییەوە و ئەرسەلان بایز و عیماد ئەحمەد و ئاسۆ مامەند لە یەکێتییەوە.

ئەو سەرچاوە ئاگادارە گوتیشی: ئەرکی لیژنەکە ئەوەیە کار بۆ یەکلاکردنەوەی مەسەلەی دابەشکردنی پۆستە حکوومی و وەزارییەکان بکات و لەبارەی دۆخی پارێزگای کەرکووک و یەکخستنی نێوماڵی کورد لە بەغدا و کۆتاییهێنان بە ناکۆکییەکان سێ ئەرکی دیکەی لیژنە هاوبەشەکەیە.