بەپێی هەواڵی کوردپرێس، فراکسیۆنی کۆمه‌ڵ له په‌رله‌مانی کوردستان له ڕاگه‌یه‌ندراوێکدا بڵاویکرده‌وه، سه‌باره‌ت به بڕیاری دادگای فیدراڵی تایبه‌ت به دۆسێی نه‌وتی هه‌رێمی کوردستان، ئێمه له فراکسیۆنی کۆمه‌ڵ پێمانوایه: "به‌رله‌وه‌ی ده‌سه‌ڵاتی سیاسیی له هه‌رێمی کوردستان چاوه‌ڕێی بکردایه بزانێت دادگای فیدڕاڵی چی ده‌ڵێت و چ بڕیارێک ده‌دات له‌سه‌ر پرسی نه‌وت، ده‌بوو گوێی له هێزه‌کانی ئۆپۆزسیۆن و خه‌ڵکی کوردستان بگرتایه که چه‌ندین ساڵه داوای شه‌فافیه‌ت ده‌که‌ین، ئه‌وه‌ش به جێبه‌جێکردنی یاسای نه‌وت و گاز و ئاشکرا کردنی داهاته‌کان و هێنانی گرێبه‌سته‌کان بۆ په‌رله‌مانی کوردستان و ئاشکراکردنی ڕێککه‌وتنه نهێنیه ژێربه‌ژێره‌کان و دامه‌زراندنی سندوقی کوردستان بۆ داهاته نه‌وتیه‌کان".
فراکسیۆنەکە راشیگه‌یاند، به‌داخه‌وه، له 10 ساڵی ڕابردودا ده‌سه‌ڵات و کابینه یه‌ک له دوای یه‌که‌کانی حکومه‌تی هه‌رێمی کوردستان، ئاماده‌نه‌بون که‌مترین شه‌فافیه‌ت له دۆسیه‌ی نه‌وتدا به‌رقه‌راربکه‌ن، گوێ له دڵسۆزانی ناوخۆ بگرن که ئامانجمان بو نه‌وت ببێته خێر و خۆشی بۆ خه‌ڵک نه‌ک ببێته هۆی نانبڕین و قه‌رزارکردنی خه‌ڵکی کوردستان‌و ده‌وڵه‌مه‌ندکردنی کۆمپانیا حزبی و بیانییه‌کان".
ئاماژه‌ی به‌وه‌ش کردوه، سه‌باره‌ت به چۆنیه‌تی مامه‌ڵه‌کردن له‌گه‌ڵ بڕیاره‌که، ئێمه پێمانوایه، "ئینکاریی و تۆمه‌تبارکردن و ڕقه‌به‌رایه‌تی به قازانج بۆ هیچ لایه‌ک ناشکێته‌وه، پێویسته حکومه‌تی هه‌رێمی کوردستان ئه‌م بڕیاره بکاته سه‌ره‌تای شه‌فافیه‌ت له نه‌وت و کردنه‌وه‌ی ده‌رگای گفتوگۆ و رێککه‌وتنی ڕاسته‌قینه له‌گه‌ڵ به‌غدا و کۆتایهێنان به کۆمپانیای حزبی‌‌و به نهێنی هێشتنه‌وه‌ی دۆسیه‌ی نه‌وت و ڕێککه‌وتنه ژێربه‌ژێره‌کان، چونکه مافه ده‌ستورییه‌کان له ده‌ستوری عێراقی فیدراڵدا که خه‌ڵکی کوردستانیش ده‌نگی پێداوه، ده‌رفه‌تی باشی تیایه بۆ ڕێککه‌وتن له‌سه‌ر نه‌وت و داهات و ئه‌رک و ده‌سه‌ڵات له بواری داهات و خه‌رجی و سامانه سروشتییه‌کان له نێوان به‌غداو هه‌رێمی کوردستاندا".
فراکسیۆنی کۆمه‌ڵی دادگه‌ری باسی له‌وه‌ش کردوه، "به پێی ده‌ستوور، هه‌رێمی کوردستان و خه‌ڵکه‌که‌ی ده‌توانن سوود له ته‌واوی نه‌وتی عێراق و داهات و ده‌سه‌ڵاته فیدراڵیه‌کان وه‌ربگرن، نه‌وت و سه‌رجه‌م داهاته‌کان بۆ خێر و خۆشی خه‌ڵکی کوردستان و گه‌لانی عێراق خه‌رج بکرێن، ئه‌مه جگه له چه‌سپاوی مافه نه‌ته‌وه‌یی‌و مێژویی و خواکرده‌کان بۆ ڕێزگرتن له گه‌لی کورد وه‌ک پێکهاته‌یه‌کی نه‌ته‌وه‌یی له چوارچێوه‌ی عێراقی فیدڕاڵدا".
هه‌ر له‌و راگه‌یه‌ندراوه‌دا ئاماژه‌ی بۆئه‌وه کردوه، "پێمانوایه ته‌نها چاره‌سه‌ر بۆ هه‌ردو حکومه‌تی هه‌رێمی کوردستان و حکومه‌تی فیدراڵ له یه‌ک تێگه‌یشتن و پێکه‌وه کارکردن و ڕێککه‌وتنه له‌سه‌ر بنه‌مای پاراستنی به‌رژه‌وه‌ندی خه‌ڵکی هه‌رێمی کوردستان و تێکڕای هاوڵاتیانی عێراقی فیدراڵ، هوشداریش ده‌ده‌ین له‌وه‌ی ڕه‌تکردنه‌وه‌ی گفتوگۆ و لێکتێگه‌یشتن و خۆدزینه‌وه‌ی لایه‌نه‌کانی ده‌سه‌ڵاتی سیاسیی هه‌رێم له‌گه‌ڵ به‌غدا زیانی بۆ هه‌مو خه‌ڵکی عێراق و هه‌رێمی کوردستانیش هه‌یه و ئه‌نجامی خراپتر به‌دوای خۆیدا ده‌هێنێت و دواجار ده‌بێت ئه‌و لایه‌نانه ته‌حه‌مولی ده‌ره‌نجام و ده‌رهاویشته نه‌خوازراوه‌کانی بکه‌ن و به‌رپرسیاریه‌تی ھه‌ڵبگرن".
Your Comment