به‌پێی هه‌واڵی کوردپرێس، مانگرتن له خواردنی له‌یلا گوڤه‌ن هاوسه‌رۆكی كه‌جه‌ده و په‌رله‌مانتاری هه‌ده‌په له په‌رله‌مانی توركیا، كه به ئامانجی كۆتایی هێنان به گۆشه‌گیریی سه‌ر عه‌بدوڵڵا ئۆجه‌لان ڕێبه‌ری په‌كه‌كه له 70ه‌مین ڕۆژدایه، كێشه‌ی ته‌ندروستی بۆ دروست بوووه و له‌وباره‌یه‌شه‌وه پارێزه‌ر جه‌میله تورهال ڕای‌گه‌یاندوووه: "وره و ئیراده‌ی زۆر به‌رزه و باوه‌ڕی وایه ده‌گاته ئامانجی خۆی كه كۆتایی هێنانه به گۆشه‌گیری سه‌ر ئۆجه‌لان".
ئه‌و پارێزه‌ره باسی له‌وه كرد که ڕۆژی سێشه‌ممه 15ی کانوونی دووهه‌می 2019 بۆ بینینی گوڤه‌ن سه‌ردانی به‌ندیخانه‌ی كردوووه و له‌وباره‌یه‌شه‌وه ده‌ڵێت: "پێشتر ڕۆژانه ده‌یخوێنده‌وه به‌ڵام ئێستا ناتوانێت به‌تایبه‌تی ته‌ركیزی نه‌ماوه. كێشه‌ی بینینیشی بۆ دروست بوووه هه‌ر بۆیه ناتوانێت وه‌ک جاران بجووڵێته‌وه و به پێ بڕوات، هه‌روه‌ک قسه‌كردن زۆر ماندووی ده‌كات، هه‌موو هه‌وڵیشی ئه‌وه‌یه ئه‌و نامانه‌ی بۆی ده‌ڕوات به بێ وه‌ڵام نه‌هێڵێته‌وه".
به وته‌ی پارێزه‌ره‌كه، له‌یلا گوڤه‌ن گوشاری خوێنی زۆر دابه‌زیه‌وه و ماوه‌ی 15 ڕۆژه ئۆتۆمبێلی فریاكه‌وتن له ئاماده‌باشیدایه.
سه‌رچاوه: ڕادیۆ نه‌وا
کۆدی هه‌واڵنێر: 60103
Your Comment