به‌پێی هه‌واڵی کوردپرێس، د. مه‌حموود عوسمان سیاسه‌تمه‌داری کورد به ماڵپه‌ڕی فه‌رمیی پارتی دیموکراتی کوردستانی ڕاگه‌یاند: "پارتی دیموکراتی کوردستان کاندیداکانی خۆی بۆ پۆستی سه‌رۆکی ھه‌رێم و حکوومه‌ت دیاری کردوووه و پێویسته دانووستان له نێوان لایه‌نه‌کاندا ده‌ست پێبکات بۆ ئه‌وه‌ی بگه‌نه ڕێککه‌وتن، ھه‌م له‌سه‌ر پۆسته‌کان و ھه‌میش له‌سه‌ر به‌رنامه‌ی حکوومه‌ت و به شێوه‌یێک بتوانن حکوومه‌تی نوێ دروست بکه‌ن و پرسی سه‌رۆکایه‌تیی ھه‌رێمیش له په‌رله‌مان بڕیاری لێ بدرێت که له ناو په‌رله‌مان ھه‌ڵبژێردرێت یان له ناو خه‌ڵک."
د. مه‌حموود عوسمان گوتیشی: "ئه‌وه‌ی گرینگیشه ئه‌وه‌یه که ئه‌گه‌ر مه‌سروور بارزانی بێت یان نێچیرڤان بارزانی به ڕێنماییی مه‌سعوود بارزانی کار ده‌که‌ن و سیاسه‌تی ئه‌ویش ڕوونه و سه‌ردانی به‌غدای کردوووه و ده‌یه‌وێت له ناوخۆش کێشه‌کان چاره‌سه‌ر بکات و خۆیشیان وه‌کوو که‌سایه‌تی ڕۆڵی خۆیان ده‌بینن."
ناوبراو باسی له‌وه‌ش کرد: "من به ھیچ شێوه‌یێک له‌گه‌ڵ حکوومه‌تی بنکه‌فراوان نیم و پێویسته حکوومه‌تی زۆرینه دروست بکرێت، له ڕابردوودا حکوومه‌تی بنکه‌فراوان ھه‌ڵه بوو چوونکه ناکرێ ھه‌موو خه‌ڵک له ناو حکوومه‌ت بێت و پێویسته خه‌ڵکانێک ئۆپۆزیسیۆن بن بۆ ئه‌وه‌ی چاودێریی حکوومه‌ت بکه‌ن، چوونکه سیسته‌می په‌رله‌مانی پێویسته ئۆپۆزیسیۆنی ھه‌بێت بۆیه ئه‌و ھه‌نگاوه‌ی پارتی له‌وباره‌یه‌وه ده‌ینێت دروسته و زۆر باشه که باس له پێکھێنانی حکوومه‌تی زۆرینه ده‌کات."
ئه‌و سیاسه‌تمه‌داره‌ی کورد ئه‌وه‌یشی خسته ڕوو: "حکوومه‌تی داھاتوو یه‌کێتی تێیدا به‌شدار ده‌بێت و جارێ دیار نییه که گۆڕانیش به‌شدار ده‌بێت یان نا، به‌ڵام ئه‌وه‌ی به‌شداری بێت پێویسته پابه‌ندی به‌رنامه‌ی حکوومه‌ت بێت و نابێ له ناو حکوومه‌تیشدا بن و دژایه‌تیشی بکه‌ن بۆیه پێویسته پشتگیری له سیاسه‌تی حکوومه‌ت بکه‌ن، ئه‌گه‌رنا با ببنه ئۆپۆزیسیۆن بۆیه پێویسته پارتی ئه‌مه بکاته مه‌رج که ئه‌مجاره ئه‌وه‌ی به‌شدار بێت پێویسته به‌رپرسیارێتی ھه‌ڵگرێت."
کۆدی هه‌واڵنێر: 60103
Your Comment