بەپێی هەواڵی کوردپرێس، سەرۆکایەتی هەرێم بڵاویکردەوە، به‌يانيى ئه‌مڕۆ دووشه‌ممه نێچيرڤان بارزانى، سه‌رۆکى هه‌رێمى کوردستان پێشوازىی له دادوه‌ر هنرى خورى، وه‌زيرى دادى لوبنانى و شاندێکى ياوه‌رى کرد که له‌سه‌رۆکى ئه‌نجومه‌نى دادوه‌ريى لوبنان، ياريده‌ده‌ر‌ى ئه‌منيدارى گشتيى کۆمکارى عه‌ره‌بى و ژماره‌يه‌ک له ڕاوێژکاران پێکهاتبوون و به بانگهێشتێک بۆ به‌شدارى له يادى ڕۆژى دادوه‌ريى عێراقدا، سه‌ردانى به‌غدايان کردبوو.
ئەوەش هاتووە، له ديدارێکدا که وه‌زيرى دادى هه‌رێمى کوردستان ئاماده‌ى بوو، تيشک خرايه سه‌ر سيستم و دۆخى ده‌سه‌ڵاتى دادوه‌رى و دادگاکان و لێکچونيان له لوبنان و عێراق و هه‌رێمى کوردستان و بوارى هاريکاريى نێوان ده‌سه‌ڵاتى دادوه‌ريى لوبنان و عێراق و سوودوه‌رگرتن له ئه‌زموونه‌کانى يه‌کتر خرايه به‌ر باس، هه‌روه‌ها جه‌خت له گرنگيى سه‌ربه‌خۆييى ده‌سه‌ڵاتى دادوه‌رى کرايه‌وه و هه‌ردوولا هاوڕا بوون که سه‌ربه‌خۆييى دادوه‌رى بنه‌ماى ده‌وڵه‌تدارييه.
لە راگەیەنراوی کۆبوونەوەکەدا هاتووە، دوايين پێشهاته‌کانى دۆخى سياسى و ئه‌منى له عێراق و لوبنان ته‌وه‌رێکى ديکه‌ى ديداره‌که بوو. له‌مباره‌يه‌وه شاندى لوبنانى پوخته‌يه‌کيان ده‌رباره‌ى هه‌وڵه‌کانى حکوومه‌تى لوبنان بۆ تێپه‌ڕاندنى دۆخى سه‌ختى ئێستاى ئابووريى وڵاته‌که و قه‌يرانه‌کان خسته‌ڕوو، هه‌روه‌ها باسيان له ده‌سپێشخه‌رييه‌کى کۆمکارى عه‌ره‌بى بۆ پشتيوانيى ده‌سه‌ڵاتى دادوه‌ريى لوبنانى له دۆخى ئێستايدا کرد.
لای خۆیەوە نێچيرڤان بارزانى سه‌ردانى شانده‌که‌ى بۆ عراق و هه‌رێمى کوردستان به گرنگ له قه‌ڵه‌م دا و رایگەیاند، ئومێدەوارە هاريکاريى عێراق و هه‌رێمى کوردستان له‌گه‌ڵ لوبنان له بوارى دادوه‌ريدا پته‌وتر بکرێت و ئاماژه‌ى به ڕۆڵى ڕه‌وه‌ندى لوبنانى له هه‌رێمى کوردستان کرد به‌تايبه‌تيش له بواره‌کانى ئاوه‌دانکردنه‌وه و خزمه‌تگوزارى و بانکداريدا.
Your Comment