هەڤاڵ عیسا ئەندامی لیژنەی ناوەندیی پارتی یەکێتیی کوردستانیی سووریا (P.Y.K.S) لە گفتوگۆ لەگەڵ کوردپرێسدا بە ئاماژە دان بە هۆکارەکانی بە بنبەست گەیشتنی دانوستانی ئەنجومەنی نیشتمانیی کورد و حزبەکانی یەکێتیی نیشتمانی کورد، ڕایگەیاند: ئێمە هەر لە ڕۆژی یەکەمەوە وەکوو ئەنەکەسە بەدوای دانوستانێکدا بووین کە ئەنجامی ستراتێژی و یەکگرتنی ڕاستەقینەی بەدواوە ببێت.

ناوبراو درێژەی دا: ئێمە دەمانەوێت بۆ چارەسەر کردنی کێشەی کوردەکان لە سووریا و یەکگرتنی سیاسی بگەینە ڕێککەوتن بەڵام لایەنی بەرامبەرمان واتا پەیەدە حزبەکانی یەکێتیی نیشتمانیی کورد بڕوایان بە ڕێککەوتن نییە. لە سەرەتاکانەوە چەندین گفتوگۆ ئەنجام درا و هەندێک ڕێککەوتنی سەرەتاییش کرا بەڵام پاشان ئەوان بەڵێنەکانیان لەبیر بردەوە و هەڵمەتی نابەجێیان لەدژی لایەنگرانی ئەنەکەسە و ڕۆشنبیران و ڕۆژنامەنووسە سەربەخۆکان ئەنجام داو

هەڤاڵ عیسا ئاشکراشی کرد: ژمارەیێک لە نوسینگەکانی ئەنجومەنی نیشتمانی لەلایەن هەوادارانی پەیەدە و پەکەکە-وە ئاگری تێبەربووە و چەند ڕۆژ پێش ئێستاش لە ساڵۆگەری ئاڵای کوردستاندا دووبارە هێرشیان کردە سەر نوسینگەکانی ئەنجومەنەکەمان لە شاری دەربەسیە و سێ کەس لە ئەندامانی ئەنەکەسەیان تووشی برینی سەخت کرد و هەروەها بە مۆلۆتۆف هێرشیان کردە سەر خانووی ڕۆژنامەنووسێکی لایەنگری ئەنەکەسە.

ئەندامی لیژنەی ناوەندیی پارتی یەکێتیی کوردستانیی سووریا (P.Y.K.S) وەبیری هێنایەوە: چەند ڕۆژ پێش ئێستاش هێرشیان کردە سەر دەروازەی پیشخابوور و بە سووکایەتی کردن بە یاساکان و کەسایەتییە باڵاکانی هەرێمی کوردستان بوونە هۆی داخرانی سنوورەکە.

هەڤاڵ عیسا جەختی کردەوە: ئێمە ئەمریکا و مەزڵووم عەبدی بە بەرپرس دەزانین لەو هەڵمەتانەی کە PYD لەدژی ENKS ئەنجامی دەدات، چوونکە ئەمریکا وەکوو گەرەنتیکار لە دانوستانەکاندا ئامادیە.

ناوبراو ڕاشیگەیاند: ئێمە بڕوامان بە دانوستانی کوردی-کوردی هەیە و بۆ یەکگرتنی سیاسیی ڕەوتە کوردییەکان هەوڵ دەدەین.

سرور خدری