کوردپرێس:

ئایەتوڵڵا سەید ئیبراهیم ڕەئیسی سەرۆککۆماری ئێران لە دیدار لەگەڵ شێخ تەحنوون بین زاید ئالی نەهیان ڕاوێژکاری باڵای ئاسایشی نیشمانیی ئیمارات ئاماژەی بە مێژووی پێوەندیی ئیجابیی دوو وڵاتەکە کرد و گوتیشی: پێوەندیی ئیجابیی وڵاتانی هەرێمی لە یەکەمایەتیی سیاسەتی دەرەوەی ئیدارەی نوێی ئێرانە و لەو چوارچێوەیەشدا پێشوازی لە فراوان کردنی پێوەندییەکان لەگەڵ ئیمارات دەکات.

سەرۆککۆماری ئێران زیادی کرد: لە پێوەندیی دوو وڵاتی موسڵمانی ئێران و ئیماراتدا نابێت ئاستەنگ بمێنێت و ئەو پێوەندییە کاریگەری لە تەداخول و دەستوەردانی بێگانەکان وەربگرێت.

ڕەئیسی گوتیشی: سیاسەتی دوژمنانی وڵاتانی هەرێمی ئەوەیە ترس و دڵەڕاوکێ لە نێو دراوسێکان دروست بکەن بەڵام ئەو پیلانە بە عەقڵ و تێگەیشتنی هاوبەش پووچەڵ دەبێتەوە.

لای خۆیەوە ڕاوێژکاری ئاسایشی نیشتمانیی ئیماراتیش گوتی: ئێمە ڕۆڵەی ئەم ناوچەیەین و خاوەنی یەک چارەنووسی هاوبەشین و پێشوازی دەکەین لە فراوان کردنی پێوەندیی نێوان دوو وڵاتەکە.

شێخ تەحنوون بین زاید ئال نەهیان ئاماژەی بە دانووستانی تێروتەسەلی خۆی لەگەڵ هاوتا ئێرانییەکەی کرد و گوتیشی: ئەو دیدارانە دەبنە خاڵێکی وەرچەرخان لە پێوەندیی نێوان دوو وڵاتەکەدا.

هەر لە دیدارەکەدا ڕاوێژکاری ئاسایشی نیشتمانیی ئیمارات بە فەرمی بانگهێشتنامەی پێشکەش بە سەرۆککۆماری ئێران کرد بۆ ئەوەی سەردانی ئیمارات بکات.