به‌پێی هه‌واڵی کوردپرێس، ئه‌مڕۆ دووشه‌ممه 24ی ئه‌یلوول حکوومه‌تی هه‌رێمی کوردستان له ڕێگای ڕاگه‌یێندراوێکه‌وه سه‌رکۆنه‌ی هێرشه‌که‌ی ئه‌هواز ده‌کات و له‌و ڕاگه‌یێندراوه‌دا هاتوووه: "حكوومه‌تى هه‌رێمى كوردستان سه‌رزه‌نشتى ئه‌و هێرشه تیرۆرستییه ده‌كات كه (ڕۆژی شه‌ممه) له شارى ئه‌هوازى باشوورى ئێران كرایه سه‌ر نمایشێكى سه‌ربازى و تیایدا ژماره‌یێک له سه‌رباز و خه‌ڵكى سڤیل و میدیاكارانى ئاماده‌ى نمایشه‌كه گیانیان له ده‌ست دا و ژماره‌یێكى دیكه‌شیان بریندار بوون."
له كۆتاییی ڕاگه‌یێندراوه‌که‌شدا حكوومه‌تی هه‌رێم پرسه و سه‌ره‌خۆشى له كه‌سوكارى قوربانییان و كۆمارى ئیسلامیى ئێران ده‌كات و و زووچاكبوونه‌وه بۆ برینداران ده‌خوازێت.
حكوومه‌تی هه‌رێم هیواخوازیشه ئه‌وانه‌ی په‌یوه‌ندییان به هێرشه‌كه‌وه هه‌یه بدۆزرێنه‌وه و به سزاى یاساییی خۆیان بگه‌ن.
شایانی باسه؛ ڕۆژی شه‌ممه 22ی ئه‌یلوول 4 چه‌كدار هێرشیان كرده سه‌ر نمایشێكی سه‌ربازی له ئه‌هوازی باشووری ئێران و له ئاكامیشدا 29 كه‌س كوژران و 70 كه‌سی دیكه‌ش بریندار بوون.
سه‌رچاوه: میدیاکانی هه‌رێمی کوردستان
کۆدی هه‌واڵنێر: 60103
Your Comment