کوردپرێس:

رۆژی یەکشەممە 16/9/2018، ئەنجومەنی ئاسایشی نیشتمانی بە سەرۆکایەتیی حەیدەر عەبادی، فەرماندەی گشتیی هێزە چەکدارەکانی عێراق کۆ بوویەوە.

بەپێی راگەیێندراوێکی نووسینگەی سەرۆکوەزیرانی عێراق، لە کۆبوونەوەکەدا گفتوگۆ لەبارەی "ئاسایش و سەقامگیری، توندوتۆڵکردن ،دۆکیۆمێنێتکردنی پێشلکارییەکان بۆ سەر زەوی و ئاسمانی عێراق، کراوە".

لە کۆبوونەوەکەدا رێکخستن و ئەرکە سەرەکییەکانی پۆلیسی فیدراڵی و پڕچەککردن و بەهێزکردنی رۆڵی تەواوکاریان لەگەڵ سوپای عێراقی باس کراوە. هاوکات ئەنجومەنەکە دۆخی سەقامگیریی بەسرە و رێوشوێنەکان و پاراستنی خەڵک و موڵک و ماڵی گشتی تاوتوێکردووە.

بڕیارەکانی ئەنجومەنەکە:

یەکەم: وەزارەتی ناوخۆ دووبارەی چاوخشانەوە دەکات بە رێکخستنەوەی پۆلیسی فیدراڵی.

دووەم: وەزارەتی دەرەوە رێوشوێنی گونجاو دەگرێتە بەر بۆ بە دۆکیۆمێنتکردنی پێشلکارییەکانی تورکیا بۆ ئاسمانی عێراق لای نەتەوەیەکگرتووەکان و دووبارەخستنەڕووی لە ئەنجومەنی ئاسایشی نیشتمانی.

سێیەم: بڵاوکردنەوەی پاسەوانی سنوور بەدرێژاییی سنووری عێراق- تورکیا بۆ پاراستنی سنوور و رێگریکردن لە هەر پێشێلکارییێک و ئامادەکردن و دابینکردن و تەرخانکردنی سەرجەم پێداویستییەکانی.

چوارەم: پەسندکردنی یاداشتی لێکتێگەیشتنی ئەمنیی نێوان هەردوو وەزارەتی ناوخۆی عێراقی و هەنگاریا و سەرپشک و پێدانی دەسەڵات بە وەزارەتی ناوخۆ بۆ دانووستاندن و واژۆکردن.