کوردپرێس:
لە گوتارێكدا له‌باره‌ی په‌یوه‌ندییه‌كانی نێوان توركیا - ئه‌مریكا، ئیبراهیم کاڵن دەڵێت، دابه‌زینی به‌های لیرە به‌رامبه‌ر دۆلاری ئه‌مریكی وه‌ک تاقیكردنه‌وه‌یێک به‌رامبه‌ریان سه‌یر ده‌كه‌ن و نوسیوویه‌تی "توركیا ئاماده‌ی به‌ره‌نگاربوونه‌وه‌ی ئه‌م سه‌ختییه‌یه. له‌ڕاستیدا ئه‌م بابه‌ته له‌ولاتری جه‌نگی به‌های دراوی بیانی به‌رامبه‌ر دراوی نیشتیمانییه.
ئیداره‌ی تره‌مپ به‌هۆی پرسی له ماڵه‌وه زیندانیكردنی قه‌شه برونسۆن به تۆمه‌تی تیرۆر، بڕیاریدا سزا به‌سه‌ر دوو وه‌زیری توركیادا بسه‌پێنێت، ئه‌وه‌ش كێشه‌ی خسته ناو په‌یوه‌ندییه‌كانی توركیا و ئه‌مریكا. هه‌وڵه دیپلۆماسییه‌كانی توركیا بۆ چاره‌سه‌ركردنی كێشه‌كه له‌لایه‌ن ئه‌مریكییه‌كانه‌وه ره‌تكرانه‌وه. نیازپاكی توركیا و دیدگای ئه‌و بۆ گه‌یشتنه ئه‌نجام له‌لایه‌ن هه‌ڵوێستی ئایدۆلۆژیانه و هه‌ڵسوكه‌وتی دوور له تێگه‌یشتنی ئیداره‌ی تره‌مپ په‌راوێزخرا".
كاڵن جه‌ختی كردووه‌ته‌وه، توركیا له‌باره‌ی نیگه‌رانیی ئه‌منییه‌وه مافی خۆیه‌تی له‌وه‌ی داوا بكات له لایه‌ن هاوپه‌یمانیی ناتۆوه گرنگیی پێبدرێت و نووسیویەتی "به‌ڵام ئه‌مریكا هه‌م له‌سه‌رده‌می ئۆباما و هه‌میش لەسەردەمی تره‌مپ، گوێیان به نیگه‌رانییه‌كانی توركیا له‌باره‌ی باڵی په‌كه‌كه له سووریا په‌یه‌ده/یه‌په‌گه نه‌دا. له‌باره‌ی پێكهاته‌ی گولەنییەکانەوە له ئه‌مریكا هه‌نگاوی نه‌نا. نه به‌ره‌نگاربوونه‌وه‌ی داعش، نه سیستەمی ئه‌مریكا ناتوانن شه‌رعییه‌ت بده‌ن به‌و سیاسه‌ته‌ی كه زیان به به‌رژه‌وه‌ندییه نه‌ته‌وه‌ییه‌كانی توركیا و په‌یوه‌ندییه‌كانی توركیا-ئه‌مریكا ده‌گه‌یه‌نن".
گوته‌بێژی سه‌رۆكایه‌تیی كۆماری توركیا رایگه‌یاندووه، ئه‌مریكا له‌به‌رده‌م مه‌ترسیی له‌ده‌ستدانی توركیادایه و نووسیویه‌تی "رای گشتیی توركیا به گشتی دژی سیاسه‌ته‌كانی ئه‌مریكایه كه نیگه‌رانییه ره‌وا ئه‌منییه‌كانمان به‌هه‌ند وه‌رناگرێت. هه‌ڕه‌شه‌كردن، سزا خستنه‌سه‌ر و خۆسه‌پاندن به‌رامبه‌ر توركیا هیچ سوودێكی نابێت. به‌ڵام سووربوونی توركیا زیاتر ده‌كات و ئه‌مریكا هه‌م له‌لای توركیا و هه‌م له‌كایه‌ی نێوده‌وڵه‌تیدا ته‌نیاتر ده‌كات. حكومه‌تی تره‌مپ تاوەکو ئێستا شه‌ڕی له‌گه‌ڵ مه‌كسیك، كه‌نه‌دا، چین، رووسیا، ناتۆ، ئه‌ڵمانیا و چه‌ندین وڵاتی دیكه كردووه به‌تایبه‌ت به‌هۆی پرست ناوخۆییه‌وه. ئه‌م دۆخه زیان به پێگه‌ی ئه‌مریكا وه‌ك دۆستێكی متمانه‌پێكراو ده‌گه‌یه‌نێت. تێگه‌یشتنی توركیاش له‌وه جیاواز نییه".
دوای تێکچوونی پەیوەندییەکان و دابەزینی بەهای لیرە بەرامبەر دۆلار، بەرپرسانی واشنتن و ئەنقەرە لێدوانی دژ بە یەکدی دەدەن.
لە بابەتێکدا کە لە رۆژنامەی نیویۆرک تایمزی ئەمریکی بڵاو کراوەتەوە، ئەردۆغان دەڵێت، هەڵوێست و سزاکانی دۆناڵد ترەمپ، سەرۆکی ئەمریکا بەرامبەر تورکیا بەهۆی دەستگیرکردنی قەشە ئەندرۆ برۆنسۆن "قبوڵنەکراوە، ناعەقڵانییە و دەبێتە هۆی کۆتایهێنان بە هاوپەیمانێتیمان".
لەبارەی داواکەی ئیدارەی بۆ ئازادکردنی قەشە ئەمریکییەکە، ئەردۆغان دەڵێت "هەوڵدان بۆ ئەوەی حکومەتەکەم ناچاربێ دەستوەردان لە کاروباری دادگا بکات کارێکی نادەستوورییە و لەگەڵ دیموکراسی یەکناگرێتەوە".
وەک ئەردۆغان ئاماژەی پێکردووە، واشنتن و ئەنقەرە هاوپەیمانی ستراتیژی شەش دەیەی رابردوون، لەنێو ناتۆ-شدا دوو هاوپەیمانی بەهێزی یەکدین.
سوپاکانی ئەمریکا و تورکیا یەکەم و دووەم بەهێزترین سوپای نێو پەیمانی باکووری ئەتڵەسی ناسراو بە "ناتۆ"ن، کە وڵاتەکانی نێو هاوپەیمانێتییەکە پارێزگاری لە یەکدی دەکەن و شەڕ دژی هەر وڵاتێکیان راگەیاندنی شەڕە دژی هەر 29 وڵاتەکەی دیکە.
سەرۆکی تورکیا رەخنە لە هەڵوێستی ئەمریکا لە چەند پرسێکدا دەگرێت، بەتایبەت کودەتا شکستخواردووەکەی هاوینی ساڵی 2016 و پێدانی چەک بە یەپەگە بۆ شەڕی دژی داعش.
Your Comment