«ببێهجەت شێخۆ» ئەندامی لیژنەی ناوەندیی پارتی یەکێتیی کوردستانی لە سووریا (P.Y.K.S) لە گفتوگۆ لەگەڵ کوردپرێسدا ئاماژەی دا بە سەرکەوتنی بایدن لە هەڵبژاردنەکانی سەرۆک کۆماری لە ئەمریکا و کاریگەریی ئەو سەرکەوتنە لەسەر کوردی سووریا و وتی: هەڵبژاردنەکان لە ئەمریکا لەسەر بنەمای سیستەمێکی دیموکراسیی بەهێز دامەزراوە و ئەم ناوەندگەلە ئەمریکا بەڕێوەدەبەن و نەبەسراون بە تاکەکەسەوە و سیاسەتی ستراتێژیی و بیانیی ئەمریکا هەر لەسەر ئەم بەرنامەیە دیاری دەکرێت.

ناوبراو درێژەی دا: سەرۆکی ئەمریکا ڕۆڵێکی گرینگی لەسیاسەتدانانی ئەمریکادا هەیە و لە چوار ساڵی ڕابردوودا دیتمان کە ترەمپ خەساری لە هەندێک ناوچە کوردییەکان دا بەتایبەت لەسەردەمی ئەودا عەفرین، گرێ سپی، سەرێ کانی لەلایەن گرووپە چەکدارەکان و تورکیاوە داگیر کران.

ئەندامی لیژنەی ناوەندیی پارتی یەکێتیی کوردستانی لە سووریا (P.Y.K.S) زیاتر وتی: لە ناوەندی تورکیاوە تاکوو قووڵایی 30 تا 50 کیلۆمەتریی ناوچەی کوردییە و کوردی تێدا دەژی و لەسەردەمی ترەمپدا خەساری زۆر لەم ناوچانە کەوت هەرچەند کە لە کۆتاییدا دانوستانی کوردی-کوردی لە کوردستانی سووریا دەستی پێکرد.

ئەندامی (P.Y.K.S) جەختی کردەوە: بایدن دۆستی کوردە چ لە ڕابردوو و چ لەئێستادا ڕای ئەرێنیی لەبارەی کوردەوە دەربڕیوە و ئەم ئەگەرەیش هەیە کە هەمبەر پرسی کورد ڕۆڵێکی ئەرێنیی بنوێنێت.

بێهجەت شێخۆ وەبیری هێنایەوە هیواارین ئەو خەسارەی لەسەردەمی ترەمپدا بەر کوردەکان کەوت لەسەردەمی بایدندا دووپات نەکرێتەوە و بایدن-یش هەمبەر پرسی کورد ڕۆڵی نەرێنی نەگێڕێت.

کۆدی هەواڵنێر: 60113