بەپێی هەواڵی کوردپرێس، لەبەرنامەیێکی تایبەتی تەلەفزیۆنیدا بەسێ هۆزات هاوسەرۆکی کۆنسەی بەڕێوەبەری کەجەکە ڕایگه‌یاند: "ڕۆژنامەوان، سیاسەتمەدار، ئەکادیمیستەکان، نووسەر، ڕێکخراوەکانی کۆمەڵگه‌ی مەدەنی، وه‌فده‌ جیاوازەکان، یاساناسەکان؛ هەموو ئەو دەوروبەرە جیاوازانەی کە دەیانەوێت ئۆجه‌لان ببینن، دەبوو توانای بینینیان هەبێت تایبه‌ت به‌پرسى ئاشتى".

ناوبراو وتیشى: "دەبوو هەر کەسێک کە دەیەوێت بتوانێت بچێتە لای ئۆجه‌لان‌ و چاوپێکەوتن بکات، دەبوو ئۆجه‌لانیش بتوانێت پەیوەندیی لەگەڵ هەر کەسێک هه‌بێت کە خۆى دەیەوێت، دەبوو سیستەمی ئیمراڵی بەتەواوی بگۆڕدرایە، دەبوو ئەم سیستەمە سیستەمی ئیمراڵی سیستەمی گۆشەگیریی‌ و ئەشکەنجە بەتەواوی لا ببرێت، دەبوو ئازادی جەستەیی ئاپۆ جێبەجێ بکرێت".

به‌سێ هۆزات ئەوەشي خستەڕوو: "مەبەستمان لە هەلومەرجی تێکۆشان ‌و ژیانی ئازاد ئەمەیە، ئازادی جەستەیی ئۆجه‌لانه‌، دەبوو ئۆجه‌لان ڕێکخستنەکەی لەناویدا هەموو ئەوانەی دەیانەوێت بیبینن دەبوو لە پەیوەندیدا بوایە، ئەمە دەبوو جێبەجێ بکرێت، ئایا ئەمە کرا؟ بێگومان نه‌خێر نەکرا، گۆشەگیریی بەردەوامە و ۲۴ ڕۆژ لە۲۷ى شوباته‌وه‌ تێپەڕیوە، هێشتا گۆڕانکاری نییە، پەیوەندی زۆر نییە، زانیاریش نییە، زانیاریمان نییە".

ناوبراو دەشڵێت: "ئەمە چۆن دەبێت؟ بەڕێوەبەری پەکەکە ڕایگەندراوێکی بڵاو کردەوە، هەتاوەکو ڕێبەر ئاپۆ نەبێت، هەتاوەکو ڕێبەر ئاپۆ ڕاستەوخۆ نەکەوێتە ناو پەکەکەوە ناتوانێت کۆنگرە کۆ بکاتەوە، ناتوانێت بڕیار بدات، ناتوانێت خۆی هەڵوەشێنێتەوە، گەریلا ناتوانێت دەست لە چەک هەڵبگرێت، ئەمە ڕوونە، هیچ لایەنێکی ئەمە بێ گفتوگۆ کردن نییە، تەنها ئۆجه‌لان دەتوانێت ئەم پرۆسەیە بەڕێوەبات".

بەسێ هۆزات جه‌ختیشی کرده‌وه‌، "هەتاوەکوو لەم بابەتەدا هەنگاوێک نەنرێت ئەم کۆنگرەیە ناتوانێت کۆ بێتەوە، ناتوانێت بڕیارێکی لەو شێوەیە وەربگرێت، تاکەکەس دەتوانێت ئەمە بکات ڕێبەر ئاپۆیە، ئه‌و بۆخۆى دامەزرێنەری پەکەکەیە، ئەوەی کۆتایی بەم پرۆسەیە ده‌هێنێت، کۆتایی بە تێکۆشانی چەکداریى ده‌هێنێت، ته‌نها و ته‌نها ڕێبەر ئاپۆ خۆیەتی، با ئه‌مه‌ ڕوون بێت".