کوردپرێس:

هووشەنگ بازوەند پارێزگاری کرماشان لە لێدوانێکدا لەبارەی مەترسیی پەرەسەندنەوەی کۆرۆنا ڤایرۆس هۆشداریی داوە و داوای لە هاووڵاتییانیش کردووە پێبەند بن بە ڕێنماییە تەندروستی و پزیشکییەکان چوونکە مەترسیی کۆرۆنا ئێستا جیدییە و نابێت خەمسارد بن لە ڕەچاو کردنی ڕێنمایییەکان.

بازوەند هەروەها داوای لە دایرە و ڕێکخراوە حکوومییەکانیش کرد خزمەتگوزاری پێشکەشی ئەو هاووڵاتییانە نەکەن کە بە بێ ماسک و بە بێ ڕەچاوکردنی ڕێنمایییەکان سەردانی دایرە و فەرمانگەکان دەکەن.

شایانی باسە بە گوێرەی دوایین ئامارەکانی وەزارەتی تەندروستیی ئێران تا ڕۆژی هەینی 31ی گەلاوێژی 1399 354 هەزار و 764 هاووڵاتیی ئێرانی تووشی کۆرۆنا بوون و ژمارەی مردن بە ڤایرۆسەکەش ڕەقەمی 20 هەزار کەسی تێپەڕاندووە.